Almaty qalasyndaǵy mektepterdiń birinde 1-synyp oqýshysy ekinshi qabattan qulap ketti, dep habarlaidy "Ult aqparat".
Qoǵamdyq densaýlyq saqtaý basqarmasynyń habarlaýynsha, oqys oqiǵa 10 qyrkúiek kúni bolǵan. Birinshi synyp oqýshysy №80 mektepttiń ekinshi qabatynan qulaǵan.
Jaraqat alǵan bala shuǵyl túrde jansaqtaý bólimine jatqyzyldy, sodan keiin travmatologiia bólimine aýystyryldy.
«Alty jasar balany kópsalaly meditsia brigadasy tekserdi. Naýqasqa bas súieginiń jaraqaty, midyń shaiqalýy, aiaǵynyń tómengi jaǵynyń eki jerden synýy degen diagnoz qoiyldy. Qazirgi ýaqytta onyń jaǵdaiy qalypty», - dedi vedomstvodan.
Keiinirek Almaty qalalyq bilim basqarmasynyń basshysy Gúlnár Qojabergenova atalǵan jáit týraly túsinikteme berdi.
«Bul oqys oqiǵa keshe boldy. Biz tekserý jumystaryn júrgizdik. Bul jerde sabaq ótkizip jatqan muǵalim kináli. Qazaq tili sabaǵy eki topqa bólinip oqytylady. Sabaq aiaqtalǵan soń muǵalim, oqýshylardy synyp jetekshisine tapsyrýǵa mindetti. Muǵalim synyptan shyǵarda balalardy sanamaǵan. Bala partanyń astyna tyǵylyp qalypty. Muǵalim synypty syrtynan jaýyp shyǵyp ketken. Al synypta jalǵyz qalǵan bala qorqyp, terezeden sekirgen»,-deidi Gúlnár Qojabergenova.
Qalalyq bilim basqarmasynyń basshysy, bul oqiǵadan soń mektep direktoryna sógis jariialanǵanyn aitty.
«Bul másele bizdiń baqylaýymyzda bolady. Ata-analar balalaryn bizge senip tapsyrady. Bala mektepte bolǵanda, onyń qaýipsizdigine mektep jaýap beredi. Búgin men mektep direktoryna sógis jariialadym. Oqýshylardyń qaýipsizdigin qamtamasyz etý - direktordyń birinshi fýnktsionaldy mindeti», - dep atap ótti basqarma basshysy.
Óz kezeginde, mektep direktory synyp jetekshisi men qazaq tili pániniń muǵalimine sógis berdi.
