Almaty qalasynda jedel meditsinalyq járdem men emhanalardyń, statsionarlardyń jumysynan bastap barlyq baǵyttar boiynsha tásilder ózgertildi. Qaladaǵy statsionarlar patsientterdiń jaǵdaiynyń aýyrlyǵyna qarai bólingen. Bul týraly PrimeMinister.kz-ke bergen suhbatynda Almaty qalasynyń Qoǵamdyq densaýlyq basqarmasynyń basshysy Kamaljan Nadyrov aityp berdi.
Qalada jedel meditsinalyq járdemnen, emhanalar men statsionarlardyń jumysynan bastap meditsinalyq kómekti uiymdastyrý boiynsha júieli jumys qurylǵan. Eger buǵan deiin klinikalar provizorlyq jáne infektsiialyq statsionarlarǵa bólingen bolsa, búginde olar patsientterdiń jaǵdaiynyń aýyrlyq dárejesine qarai bólinedi.
«Biz olardy úsh sanatqa bóldik. Birinshi sanattaǵy klinikalary — eń jaqsy materialdyq-tehnikalyq bazasy bar klinikalar, onda asa damyǵan reanimatsiia qyzmeti, qajetti mamandar jiyntyǵy bar. Ekinshi sanattaǵy klinikalarda mamandar da bar, biraq reanimatsiialyq tósek-oryn sany az. Úshinshi sanattaǵy klinikalarǵa biz aýrýynyń aýyrlyq dárejesi salystyrmaly túrde jeńil jáne ortasha patsientterdi jatqyzamyz. Mundai aǵyndar boiynsha bólý bizge patsientterdiń marshrýtyn júieli túrde qurýǵa múmkindik berdi», — dedi K. Nadyrov.
Onyń aitýynsha, búginde qalada tósek-oryn sany men saýyǵyp shyqqan patsientter sanynyń artqany baiqalady.
«Eger buryn bizde tósek-oryndardyń bos bolmaýy aýrýlar eń kóbeigen sátte 90%-ǵa jetken bolsa, qazir bul kórsetkish 50%-dan az. Árbir ekinshi tósek-oryn búginde bos, biraq osyǵan qaramastan, biz tósek-oryn qoryn ulǵaitýdy jalǵastyryp jatyrmyz», — dedi Almaty qalasynyń Qoǵamdyq densaýlyq basqarmasynyń basshysy.
Sondai-aq BMSK deńgeiinde meditsinalyq kómek kórsetý tásilderi ózgerdi, tek KVI-men aýyrǵan patsienttermen ǵana jumys isteitin arnaiy mobildi brigadalar quryldy.
«Búgingi tańda 72 mobildi brigada bar, dárigerler men ortasha meditsinalyq qyzmetkerler sany 400 adamǵa jetti. Buryn 200 adam bolǵan. Mobildi brigadalardyń mindeti — patsientterdi BMSK deńgeiinde barynsha ustaý, iaǵni asqynýlardyń damýyna jáne kelesi deńgeige — statsionarlyq deńgeide jetkizbeý», — dedi ol.
Sonymen qatar, qalada jedel járdem jumysynyń tásilderi ózgerdi. Búgingi kúni jedel járdem patsientterge kelgende, olardyń ázirlengen chek-paraǵy bolady, sol boiynsha patsienttiń aǵymdaǵy jaǵdaiyn obektivti baǵalaýǵa bolady. Aýrýdyń aýyrlyq dárejesine bailanysty jedel járdem naýqasty qandai aýrýhanaǵa jatqyzý týraly sheshim qabyldaidy.
Aita ketý kerek, COVID-19-pen kúreske tartylǵan meditsinalyq uiymdardyń sany artyp keledi. Búgingi kúni qalada shamamen 6 myń tósek-oryn bar, onda 4 440 meditsinalyq qyzmetker jumys isteidi.
«Biz sonymen qatar meditsina kadrlaryn jumyldyrý máselesin qarastyrýdamyz, óitkeni bizdiń aldymyzda tósek-oryn sanyn kem degende 7 700-ge deiin jetkizý mindeti tur. Búginde biz 1 500-ge jýyq dárigerdi qabyldadyq. Olarmen úlken daiyndyq jumystary júrgizilýde. Olar infektsiialyq qaýipsizdik, patsientterdi emdeýdi júrgizý jáne t. b. máseleler boiynsha oqytylyp jatyr. Bul turǵyda bizde osyndai mamandardy daiyndaityn arnaiy oqý-klinikalyq ortalyq quryldy», — dedi ol.
Sonymen qatar, qala basshylyǵy tósek-oryn sanyn arttyrý úshin barlyq nusqalardy pysyqtaýda. Qaladaǵy «Halyk Arena» muzaidyn saraiynyń bazasynda gospital ashyldy, onda 1000 tósek-oryn ornalasqan. Sondai-aq, sol jerge meditsinalyq gazdar, ottegi jetkizip, tolyqqandy reanimatsiialyq bólim ashý josparda bar.
«Meditsinalyq mekemelerden basqa, biz basqa da nysandardy zerdeledik, atap aitqanda, bastapqyda psihonevrologiialyq aýrýlardy emdeý ortalyǵy retinde salynyp jatqan áleýmettik nysandardyń birine toqtaldyq. Biz barlyq infraqurylymdy zerttep, ony meditsinalyq nysan retinde qaita beiindeý úshin óte qolaily ekenin túsindik. Búginde tiisti jumystar júrgizilýde. Bul 500 tósek-oryndyq tolyqqandy statsionar bolady, ony qyrkúiek aiynda paidalanýǵa berýdi josparlap otyrmyz. Onda infektsiialyq qaýipsizdiktiń barlyq talaptary saqtalatyn bolady», — dep túiindedi K. Nadyrov.
