Almaty komendatýrasynyń aqparat ortalyǵy qaladaǵy búgingi jaǵdai týraly maǵlumat berdi, dep habarlaidy QazAqparat.
Komendatýra málimetinshe, Alataý jáne Medeý aýdandarynyń aýmaǵynda lańkesterden tazartý jumystary júrgizildi.
«Lańkestik, tonaý jáne basqa da qylmystardyń 1678 qatysýshysy ustaldy. Zańsyz ainalymnan 36 birlik atys qarýy men 1 476 oq-dári tárkilendi. Almatynyń shetinde ornalasqan 5 blok- bekette 38 adam ustaldy. «102» pýltine 881 habarlama kelip tústi. Komendatýranyń Koll-tsentrine azamattardan jedel áreket etýdi talap etetin 136 dabyl tústi. Barlyq habarlama óndeldi», - dedi Almaty qalasynyń komendanty Qanat Taimerdenov.
Sonymen qatar, ol turǵyndardy komendanttyq saǵatty buzbaýǵa shaqyrdy.
«Men Almaty qalasynyń komendanty retinde azamattarǵa úndeý joldaimyn. Arańdatýshylarǵa ermei tek resmi derekterden alynǵan aqparattardy qoldanyńyzdar. Zań talaptaryn qatań saqtap, qoldanylyp jatqan sharalarǵa túsinistikpen qaraýlaryńyzdy suraimyn», - dedi ol.
