Almatyda erkin kúresten Qazaqstan ulttyq quramasynyń múshesi Ilias Jumai qoshqardy 510 ret kóterdi, dep habarlaidy "Ult aqparat" qalanyń aqparattyq-sporttyq HAB-yna silteme jasap.
Almatynyń ortalyq meshitinde Asyl mura baǵdarlamasy aiasynda musylmandardyń merekesi Qurban aitqa arnalyp ulttyq sport túrlerinen jarystar ótti.
Bul sharany tańǵy ait namazyna kelgen 4,5 myń adam tamashalady. Kez kelgen qatysýshy ózderin qoshqar kóterý, qol kúres, baǵanaǵa shyǵý jáne asyq atýdan synap kórdi.
Jeńimpazdar men júldegerler baǵaly syilyqtar, sondai-aq, qoshqar kóterý júldegerleri 40 keli qoshqarlarǵa ie boldy. Onyń ekeýi 505 jáne 510 ret kótergen jas palýandar Baýyrjan Ábdihaiym men Ilias Jumaiǵa buiyrdy.
«Men qatysaiyn ba joq pa dep kóp oilandym. Sebebi alda Reseide jarys kútip tur. Biraq 505 degendi kórip, jigerlenip, qatysýǵa bel býdym. Osylaisha 510 ret kóterip ózim úshin rekord ornattym. Men árqashanda óz qarsylasymdy jeńýge tyrysatyn adammyn. Eger ol qoshqardy 600 ret kótergende, men 605-ke jetkizýge talpynatyn edim», - deidi erkin kúresten Qazaqstan ulttyq quramasynyń múshesi Ilias Jumai.
Ilias Jumai osynyń aldynda, eki ai buryn osy baǵdarlamanyń ashylýynda da dál osyndai qoshqardy 205 ret kóterip utyp alǵan bolatyn. Ol kúrespen 8 jasynan bastap ainalysyp, elimizdiń abyroiyn kóptegen halyqaralyq jarystarda qorǵap júr.
Aita ketý kerek, búgingi sharanyń qonaqtaryna jarystardan bólek arnaiy dastarhan jaiylyp, balalarǵa táttiler taratyldy. «Asyl mura» baǵdarlamasy qaladaǵy meshitke kelýshi jamaǵattar arasynda buqaralyq sportty damytýǵa baǵyttalǵan.
