Foto: videodan alyndy
Qajylyq pen ýmraǵa aparatyn týristik kompaniiaǵa qatysty tergeý bastaldy. Osydan bir apta buryn Shymkentte, keshe Almatyda bir top azamat "Káýsar trevel" týrfirmasyna aldandyq dep aryz jazǵan, - dep habarlaidy Tengrinews.kz tilshisi KTK telearnasyna silteme jasap.
Telearna málimetinshe, 300-den asa adam aldanǵan. Basym bóliginiń Mekke men Mádinaǵa ushý merzimi áldeqashan ótip ketken. Endi ózgeleri týrfirmanyń bylyǵy kóp ekenin bilip, qomaqty qarajatyn qaitaryp berýdi talap etip otyr.
Byltyr 73 jastaǵy Jasqairat Ámirǵaliev jubaiymen jubyn jazbaǵanyna 45 jyl tolypty. Sonyń qurmetine ul-qyzdary 1,2 million teńgege Ýmraǵa joldama satyp alyp bergen. Merzim boiynsha ekeýi qazir kieli jerde bolýy kerek edi. Biraq aqsaqaldyń týrfirma keńsesiniń aldynda ainalshyqtap júrgenine bir aptaǵa jetken.
"Aqsha da, joldama da, qajylyq ta joq. Dalada qaldyq. Bastyǵy Medet Mekebai degen jigit eken, 27 jasta. Sol kisiniń ózine jolyqtym, aittym. "Erteń aqshańyz túsedi, bolady". Sonymen áli júr. Miyma esh qondyra almaimyn. Sebep ne? Bular endi Allanyń jolynda júrgen adamdar, sútten aq, sýdan taza dep esepteitin edim. Qazir endi kóńilim qatty qalyp otyr", - deidi qariia.
Aldanǵan adamdardyń árqaisy joldamany 500-600 myń teńgeniń tóńireginde satyp alypty. Bárine birdei osyndai tólendi degen bir japyraq qaǵaz ǵana ustatqan.
"Biz úsh bilet alǵanbyz. Joldas balam úsheý aldy. Jalpy, alty bilet. Men anama, jeńgeme, qyzyma alǵanmyn. 23-i ushý kerek bolǵan. 23-i kúni keńsesine keldik. Ol kisi: "10 million bar, sony taratam" dep aitty. Aqshasyn qaitarsyn degender JSN bersin dedi. JSN berdik, aqshany qaitarmady", - deidi Almaty turǵyny Ermurat Bimurzaev.
Telearna tilshileri "Káýsar treveldiń" áleýmettik jelide turǵan nómirine qońyraý shalyp kórgen, óshirýli. Sóitse kompaniia eshbir jerde tirkelmegen, ne litsenziiasy joq.
"Ýmra men qajylyqqa aparatyn kompaniialar da "Týristik qamqor" qorynyń tiziminde turady. Osyǵan nazar aýdarý kerek. Al "Káýsar trevel" kompaniiasy tizimde joq. Tirkelmegen. Turǵyndar qyzmet kórsetýdegi zańbuzýshylyqqa tap bolǵan siiaqty. Bul kompaniiaǵa júginer aldynda týristik kodty talap etýińiz kerek edi", - deidi "Týristik qamqor" qorynyń tóraǵasy Inna Rei.
Aldanǵanyn kesh túsingen jurt politseilerge jappai aryz jazdy. Tártip saqshylary osy kompaniiaǵa qatysty tergeýdi bastady.
"Almaty PD, Medeý aýdany PB-na bir kún buryn eki adam aryzdansa, búgin taǵy segiz jábirlenýshi aryz jazǵan. Mán-jaiy jan-jaqty zerdelenip, QR zańnamasyna sáikes, odan ári shara qoldanyla otyryp, quqyqtyq baǵa beriletin bolady", - deidi Almaty qalasy Politsiia departamentiniń resmi ókili Saltanat Ázirbek.
