Almatynyń monitoring toby shekteý sharalarynyń saqtalýyn baqylaý úshin kún saiyn kásipkerlik nysandarǵa tekserý júrgizedi. 10 maýsymnan 11 maýsymǵa qaraǵan túni qalada segiz zań buzýshylyq anyqtaldy, dep habarlaidy "Ult aqparat".
Monitoring top ókilderiniń aitýynsha, qalada Ashyq jobasyna kirmeitin mekemelerdiń qyzmet kórsetip jatqandary anyqtalýda. Mysaly, Bostandyq aýdanyndaǵy 1Gog restobarynda zań buzýshylyq boldy. Bul mekeme zańǵa qaishy áreketterimen tekserýshilerdiń nazaryna birneshe ret túsken.
1Gog mekemesi túngi saǵat 1-ge deiin jumys istedi. Onda 60-qa jýyq adam bolǵan. Nysan basshylyǵyn ákimshilik jaýapkershilikke tartý úshin materialdar jinaqtaldy.
Restobardaǵy karantindik sharalardy buzýmen qatar, kalian shegý faktisi anyqtaldy. Eske salsaq, qoǵamdyq oryndarda kalianǵa tolyq tyiym salynǵan. Tártip buzýshylarǵa qatysty QR Ákimshilik kodeksniń 441-baby 1-bóligi boiynsha ákimshilik hattama toltyryldy. Aita keteiik, oǵan salynatyn aiyppul kólemi 15 AEK (43 755 teńge). Almatynyń sanitarlyq dárigerleri kaliannyń ziiandy qasietteri týraly birneshe ret aitqan, sol arqyly juqpaly aýrýlar, sonyń ishinde koronavirýs ońai taralady.
Medeý aýdanynyń monitoringilik toby 10-nan 11-shi maýsymǵa qaraǵan túni Jibek Joly dańǵylyndaǵy Bacha túngi klýbynda zań buzýshylyqty anyqtady. Mekemede 80-ge jýyq adam bolǵan. Kelýshiler áleýmettik qashyqtyqty saqtamady.
Olardy jaýapkershilikke tartý týraly sheshimdi aýdandyq sanitarlyq-epidemiologiialyq baqylaý basqarmasy qabyldaidy.
Taǵy bir zań buzýshylyq Bostandyq aýdanyndaǵy «Vivaldi» karaokesinde boldy. Kóńil kóteretin oryn túngi saǵat 2.00-den keiin jumys istep, belgilengen jumys rejimin buzǵan.
Aita keteiik, jyl basynan tártip buzýshylarǵa qatysty 74 material sotqa berildi. Osy jyly Almatyda 20 naýryz ben 11 maýsym aralyǵynda belgilengen shekteýlerdi buzǵan 1112 jaǵdai anyqtaldy.
Almaty ákimdigi qala turǵyndary men qonaqtaryn karantin rejimin qatań saqtaýǵa, túngi klýbtarǵa, restobarlarǵa, saltanatty is-sharalarǵa, toilarǵa, adam kóp jinalatyn jerge barmaýǵa shaqyrady.
