Almatyda jappai tártipsizdik kezinde úsh jigit internet-dúkendi tonaǵan, dep habarlaidy QazAqparat.
Jappai tártipsizdik kezinde belgisiz bireýler Gogol kóshesinde ornalasqan internet-dúkenniń esigin buzyp kirip, ondaǵy zattardy kótergenderinshe alyp ketken.
Politsiia departamentinen málim etkendei, olardyń eń úlkeni – 30 jasta. Ol Ońtústik Qazaqstan oblysynyń týmasy, buǵan deiin de bótenniń múlkin urlaǵany úshin sottalǵan.
23 jastaǵy Shyǵys Qazaqstan oblysynyń týmasy men 22 jastaǵy almatylyq azamat alǵash ret qylmys jasap otyr.
«Tintý kezinde eki noýtbýk, úsh bý tazalaǵysh, eki kúrteshe, sporttyq kostiým jáne basqa da taýarlar tárkilendi. Atalǵan fakti boiynsha qylmystyq is qozǵalyp, tergeý amaldary júrgizilýde», - dep málim etti politsiiada.
