Biyl Almatydaǵy mektepke deiingi mekemelerde «Elektrondy balabaqsha» júiesi iske qosylady. Bul týraly Almaty qalalyq bilim basqarmasynyń basshysy Gúlnár Hodjabergenova bilim berý qyzmetkerleri forýmynda málim etti.
«Jańa oqý jylynda «Elektrondy balabaqsha» júiesin engizý josparlanyp otyr. Bul joba balalardyń sabaqqa kelýin, olardyń damý deńgeiin onlain-rejimde baqylaidy. Mektepter men mektepke deiingi mekemelerdegi ashyqtyqty qamtamasyz etedi», – deidi G. Hodjabergenova.
Onyń aitýynsha, jergilikti atqarýshy organdardyń jeke sektorda baqylaý júrgizbeýiniń saldarynan balabaqshalarda túitkildi máseleler týyndap otyr.
«Bilim basqarmasy arqyly 2018-2019 oqý jylynda jekemenshik balabaqshalarǵa taldaý jáne baqylaý júrgizildi. Nátijesinde memlekettik standartty oryndaý, balalardy qabyldaý, kelisimshart mindettemelerin oryndaý, sanitarlyq jaǵdai men balalardy tamaqtandyrýǵa qatysty birqatar zań buzýshylyqtar anyqtaldy. Atalǵan máseleni sheshý úshin úkimettik emes uiymdar men qoǵamdyq keńes ókilderin monitoringtik topqa qosyp, jekemenshik balabaqshalardyń qyzmetine qoǵamdyq baqylaý júiesin engizý qajet dep oilaimyn», – dep atap ótti bilim basqarmasy basshysy.
Forýmǵa Almaty qalasy ákimi Baqytjan Saǵyntaev, QR Bilim jáne ǵylym ministri Ashat Aimaǵambetov jáne Bilim departamenti ókilderi qatysty. Jiynda ótken jylǵa qorytyndy jasalyp, 2019-2020 oqý jylyna arnalǵan strategiialyq mindetter aiqyndaldy. Bilim basqarmasynyń dereginshe, biyl jekemenshik balabaqshalarǵa 5 milliard teńgeden astam memlekettik tapsyrys berilgen.
Aita keteiik, «Tsifrlyq Qazaqstan» memlekettik baǵdarlamasy aiasynda elimizdegi barlyq balabaqshalardaǵy qujat ainalymdary, balabaqshaǵa qabyldaý jáne kezekke turý protsesi elektrondy formatqa kóship jatyr.
