Foto: Almaty ákimdigi
Almatyda jańa EKSPO-ortalyq qurylysyna daiyndyq bastaldy. Joba aiasynda Medeý aýdanynda ornalasqan birqatar jer telimderi memleket qajetine alynyp, ielerine naryqtyq baǵamen ótemaqy tólenbek, dep habarlaidy Ult.kz.
Tiisti qaýly 2026 jylǵy 26 naýryzda qabyldanǵan. Qujatqa sáikes, bolashaq kórme kesheni Qulja tas jolynyń shyǵys bóliginde salynady. Aýmaq halyqaralyq kórmelerdi, biznes-forýmdardy, kontsertter men iri mádeni is-sharalardy ótkizýge arnalǵan kópfýnktsionaldy ortalyq bolmaq.
Jalpy alýǵa josparlanǵan jer kólemi shamamen 1 gektardy quraidy. Jer telimderin memleket qajetine alý protsesi 2027 jyldyń 31 jeltoqsanyna deiin jalǵasady.
Resmi derekke sáikes, kelesi aýmaqtardaǵy jerler alynbaq:
Qulja tas joly, 92 (0,56 ga)
Qulja tas joly, 70/2 (0,15 ga)
Almaty – Qorǵas avtojoly boiyndaǵy jer telimi (0,25 ga)
Memleket jer ielerine naryqtyq baǵamen ótemaqy usynady. Eger menshik ieleri usynylǵan somaǵa kelispese, daý sot tártibimen sheshilýi múmkin.
Almatyda memlekettik qajettilikke jer alý tek bul jobamen shektelmeidi. Qalada jańa temirjol vokzalynyń qurylysyna bailanysty 50-den astam nysandy buzý josparlanǵan. Sondai-aq kóshelerdi keńeitý jáne metronyń ekinshi jelisin salý úshin de jer telimderi alynady.
Jalpy jospar boiynsha, 2026 jyldyń sońyna deiin Almatyda 1300-den astam jer telimi memleket qajetine ótýi múmkin.
Buǵan deiin qalada jeńil relsti kólik (LRT) jelisin salý úshin 270 jer teliminiń alynatyny habarlanǵan. Joba Jetisý, Almaly, Áýezov jáne Alataý aýdandaryn qamtyp, marshrýt Almaty-2 vokzalynan Móńke bi kóshesine deiin ótedi. LRT jelisin 2029 jyly iske qosý josparlanyp otyr.
