Almatyda dúńgirshekterdi tonaǵan qylmyskerler ustaldy. Olar urlanǵan zattardy páterde qoqys qapshyqtaryna salyp qoiǵan, dep habarlaidy QazAqparat.
Áýezov aýdanynyń politsiia qyzmetkerleri qylmystyq jolmen alynǵan zattar saqtalǵan páterdi anyqtady.
Onda úsh qyz jáne eki jas jigit turǵan. Suǵanaqtardyń «Asia Park» saýda úiinde ornalasqan býtikterdi tonaǵany anyqtaldy.
Olar páterlerinde kórshilerden alǵan tisteýikterdiń kómegimen urlanǵan kiimderdiń magnittik japsyrmalaryn julyp tastaǵan.
Politsiianyń aqparatyna sáikes, ustalǵandardyń eń kishisi 19 jasta, úlkeni 28-de. Almatyǵa elimizdiń basqa aimaqtarynan kelgen. Zattai aiǵaqtary tárkilendi. Qazir kúdiktiler qamaýǵa alyndy.
