Jańa joǵary oqý orny biznes, ekonomika jáne quqyq, AT, kreativti indýstriia salalarynda britandyq diplomy bar mamandardy daiarlaityn bolady, dep habarlaidy "Ult aqparat" primeminister.kz saityna silteme jasap.
De Montfort University Kazakhstan-nyń resmi ashylý saltanatyna QR Premer-Ministriniń orynbasary Eraly Toǵjanov, Almaty ákimi Baqytjan Saǵyntaev, QR mádeniet jáne sport ministri Aqtoty Raiymqulova, QR bilim jáne ǵylym vitse-ministri Sholpan Karinova, Ulybritaniianyń halyqaralyq saýda ministri Ranil Djaiavarden, Ulybritaniianyń Qazaqstandaǵy elshisi Keti Lich qatysty.
QR Premer-Ministriniń orynbasary E. Toǵjanov quttyqtaý sózinde De Montfort University Kazakhstan elimizdegi ǵana emes, Ortalyq Aziiadaǵy ozyq joǵary oqý oryndarynyń biri bolatynyna senim bildirdi.
«Ýniversitettiń negizgi artyqshylyqtarynyń biri – túlekterdiń básekege qabilettiligi. Bas joǵary oqý ornyn bitirgen jastardyń 97%-y oqý bitirgennen keiin jarty jyl ishinde jumys tabady jáne IBM, Microsoft, BMW siiaqty kompaniialarda jumys isteidi», — dedi E. Toǵjanov.
Premer-Ministr orynbasarynyń aitýynsha, JOO jyl saiyn jalpy qabyldaý sanynyń keminde 7% kóleminde Qazaqstan azamattaryna granttar men stipendiialar bóledi degen ýaǵdalastyqqa qol jetkizilgen.
«Biz qazaqstandyq filialdyń túlekteri Angliiadaǵy kampýs túlekteri siiaqty básekege qabiletti bolady dep úmittenemiz», — dedi E. Toǵjanov.
Óz kezeginde Almaty ákimi B. Saǵyntaev Almaty qalasynyń kreativti indýstriialar saiasatyn júzege asyrýda ýniversitettiń erekshe ról atqaratynyn atap ótti.
«Biz úshin bul rasynda da óte mańyzdy. Qalanyń odan ári ósýi, eńbek ónimdiligi, ómir sapasy men biznes múmkindikteri boiynsha álemniń 100 úzdik qalasynyń qataryna ený jónindegi maqsatymyzǵa jetý úshin bizge ekonomikany ártaraptandyrý boiynsha jumysty jalǵastyrý qajet», — dedi qala ákimi.
B. Saǵyntaevtyń aitýynsha, osy maqsatta qala ekonomikasynda qurylymdyq manevr júrgizilýde. Bul – jańa ekonomikalyq ósýdiń draiverlerine ainalatyn tsifrlandyrýdy, týrizmdi jáne kreativti indýstriialardy damytý.
JOO rektory Dj. Paýnder Almaty ákimi B. Saǵyntaevqa ýniversitettiń ashylýyna qoldaý kórsetkeni jáne jaǵdai jasaǵany úshin alǵys aitty. Bul Qazaqstanda oqýǵa litsenziia alǵan jáne úzdik bilim berý standarttaryn engizý úshin qurylǵan alǵashqy sheteldik ýniversitet. Túlekterge Ulybritaniianyń DMU Lester Ýniversiteti dárejesi beriletin bolady.
Bakalavriatqa túsken alǵashqy 145 stýdent qabyldaýdan oidaǵydai ótti. «Býhgalterlik esep jáne qarjy», «Biznes jáne marketing», «Ekonomika jáne halyqaralyq qatynastar», «Biznes-quqyq», «Qarjy jáne investitsiialar» baǵyttary boiynsha bilim berý baǵdarlamalary qarastyrylǵan. Budan basqa, oqytý baǵdarlamasynda aqparatty tehnologiia, kreativti indýstriia mamandyqtary integratsiialanatyn bolady. Al atalǵan baǵyttarǵa Almatynyń 2050 jylǵa deiingi damý strategiiasynda erekshe kóńil bólinedi.
«Dóńgelek ústel» barysynda qazaqstandyq jáne britandyq taraptar Qazaqstannyń kreativti ekonomika sektoryn damytý jáne yntymaqtastyq múmkindikterin talqylady.
