Almatyda «Biýdjetke qatysý» pilottyq jobasy boiynsha jobalyq usynystardy qabyldaý bastaldy, jeńimpazdardy turǵyndar daýys berý arqyly ózderi anyqtaidy, dep habarlaidy QazAqparat.
Turǵyndar usynǵan jobalardy qabyldaý 2019 jyldyń 19 tamyzynan 1 qyrkúiekke deiin júzege asyrylady. Qabyldaý merzimi aiaqtalǵannan keiin saraptaý komissiiasy olardy irikteidi jáne 20-29 qyrkúiek aralyǵynda turǵyndar daýys beredi. Sóitip, jeńimpaz jobalar anyqtalady.
«Almatydaǵy biýdjetke qatysýdyń maqsaty - qala turǵyndarynyń usynystary men bastamalary negizinde megapolis aýdandarynyń aýmaqtaryn damytý jáne abattandyrý. Joba usynysynyń avtory Qazaqstan Respýblikasynyń azamaty, oralman, el aýmaǵynda turaqty turatyn sheteldik jáne azamattyǵy joq adam bola alady», - deidi Almaty qalalyq strategiia jáne biýdjet basqarmasy bastyǵynyń mindetin atqarýshy Janar Jazyltaeva.
Jobalyq usynystar budget.open-almaty.kz portaly arqyly beriledi. Ol úshin ótinimdi toltyrý qajet (jobalyq usynystyń ataýyn, onyń sipattamasyn, obektiniń mekenjaiyn kórsetý), jobalyq usynystyń eskizi men smetasyn mindetti túrde qosa tirkeý qajet.
Bir jobanyń eń joǵarǵy quny 100 mln teńgeden aspaýy tiis. Iske asyrý úshin joba Almaty turǵyndarynyń 10-nan astam daýysyn jinaýy tiis. Qalanyń bir turǵyny jeke ETsQ paidalana otyryp, úsh jobalyq usynysqa daýys berýge quqyly.
Buǵanǵa deiin, Baqytjan Saǵyntaev almatylyqtardy «Biýdjetke qatysý» jobasyna belsendi atsalysýǵa shaqyrǵan bolatyn.
