Almatyda bir otbasydan 4 adam kómirqyshqyl gazyna ýlanyp qaldy, dep habarlaidy QazAqparat.
Almaty qalalyq Tótenshe jaǵdailar departamenti baspasóz qyzmetinen málim etkendei, jylytý júiesindegi aqaýlar - ýly gazben ýlanýdyń negizgi sebepteriniń biri.
«5 qarasha kúni, tańǵy saǵat 08:30-da Almaty qalalyq TJD-ge Bostandyq aýdanynyń Nurlytaý yqshamaýdanynda peshtiń aqaýy saldarynan tórt adamnan turatyn otbasy (úidi jaldaýshylar) ýly gazben ýlanǵany týraly habarlama tústi. Úsh balanyń anasy 40 jastaǵy áiel aýrýhanaǵa jatýdan bas tartty. Alaida, onyń balalary 20 jáne 12 jastaǵy uldary, 11 jastaǵy qyzy ortasha jáne jeńil dárejeli aýyr halde aýrýhanaǵa tústi. Tekserý barysynda peshtiń jaryqshaqtary men tesikteri bolǵany anyqtaldy. Sonyń saldarynan úige ýly gaz taraýy múmkin», - dep túsindirdi qalalyq TJD-de.
Dárigerlerdiń aitýynsha, balalardyń jaǵdaiy qanaǵattanarlyq. Olardyń ómiri men densaýlyǵyna eshqandai qaýip tónip turǵan joq.
«QR Ákimshilik quqyq buzýshylyq týraly kodeksiniń 410-babynyń 1-bóligine sáikes, atap aitqanda, qatty otynmen jylytylatyn peshterdi paidalaný kezinde órt qaýipsizdigi talaptaryn buzǵany úshin úidiń jalǵa alýshysy ákimshilik jaýapkershilikke tartyldy», - dep tolyqtyrdy vedomstvodan.
