Almatyda qalalyq politsiia departamenti balalarǵa bilim berý ortalyqtarynyń birinde 1,5 jasar qyzdy uryp-soǵý oqiǵasyna túsinik berdi, dep habarlaidy "Ult aqparat".
«NeMolchiKz» qorynyń negizin qalaýshy Dina Tansari óziniń Facebook paraqshasynda balada soqqy izderi men mi jaraqaty bar ekenin jazdy.
«Direktor muny ózi sekildi basqa bala jasady dep málimdeidi. Oǵan sený qiyn», - dep jazdy ol.
Politsiia departamentiniń baspasóz qyzmeti habarlaǵandai, atalǵan fakti QR QK 141-baby (Balalardyń ómiri men densaýlyǵynyń qaýipsizdigin qamtamasyz etý mindetterin tiisinshe oryndamaý) boiynsha sotqa deiingi tergep-tekserýdiń biryńǵai tiziliminde tirkeldi jáne Jetisý aýdandyq politsiia basqarmasynyń is júrgizýine berildi.
«Tergeý aiasynda tiisti jumystar men saraptamalyq zertteýler júrgiziledi, olardyń nátijesinde qylmystyq is boiynsha is júrgizý sheshimi qabyldanady», - dep atap ótti qalalyq politsiia departamenti.
