Almatyda balany sporttyń 71 túri boiynsha tegin úiirmege jazýǵa bolady. Bul týraly «Almaty» telearnasynyń Akimat LIVE tikelei efirinde qala ákimi Baqytjan Saǵyntaev málim etti, dep habarlaidy QazAqparat.
Ákimniń aitýynsha, qalada 40 myńǵa jýyq balany tegin sporttyq úiirmemen qamtý josparlandy. «Biyldan bastap sport úiirmelerindegi jattyǵýlarǵa balalardyń aqysyn Almaty ákimdigi tóleitin bolady. Bul maqsatqa 1,5 milliard teńge bólindi. Tegin úiirmelerge barlyǵy 40 myńǵa jýyq balany qamtý josparlandy. Sport túrin balanyń qalaýy boiynsha tańdaýǵa bolady», - dedi ákim.
Bul memlekettik sporttyq tapsyrysty jan basyna normativtik qarjylandyrýdy engizýdiń arqasynda múmkin boldy. «Tegin úiirmelerge 4 jastan 18 jasqa deiingi balalar qatysa alady, sondai-aq, sporttyń 71 túrin tańdaýǵa bolady. Al eń qolaily úiirmeni úiden shyqpai-aq, artsport.edu.kz saitynan tańdai alasyz. Muny ata - analardyń ózderi saitqa tirkelý arqyly jasai alady», - dep naqtylady B.Saǵyntaev.
Qazirgi ýaqytta 24 myń ótinish berýshige tegin sabaqtar úshin vaýcherler berildi. 26 sport túri boiynsha 18 630 bala jattyǵýlarǵa kiristi. Fýtbol, taekvondo, karate, júzý jáne dziýdo úiirmeleri eń kóp suranysqa ie boldy. Búgingi tańda memleket tarapynan úiirmelerdegi jattyǵýlarǵa jalpy somasy 141 mln teńge tólendi. Bólingen qarajat boiynsha Almaty óńirler bólinisinde jáne úiirmelerde is júzinde ainalysatyn balalar sany boiynsha birinshi oryn alady.
