Almatyda 19 jastaǵy stýdent Aiajan Edilovany óltirdi degen qylmyskerge sot úkimi shyqty, - dep habarlaidy "Ult aqparat" Tengrinews.kz agenttigine silteme jasap.
Sot otyrysy Almaty qalasynyń qylmystyq ister jónindegi Mamandandyrylǵan aýdanaralyq sotynda jabyq ótti. Tóraǵalyq etýshi sýdia Erkin Maishinov is materialdarymen tanysyp, mynadai úkim shyǵardy:
"Sottalýshy Tórebekovke Qylmystyq kodekstiń 120-baby "Zorlaý" boiynsha 11 jylǵa bas bostandyǵynan aiyrý, al 99-baby "Adam óltirý" boiynsha 19 jylǵa bas bostandyǵynan aiyrý jazasy taǵaiyndalsyn. Sottalýshyǵa 25 jylǵa bas bostandyǵynan aiyrý jazasy taǵaiyndalsyn.
Jábirlenýshilerge 26 milliard 358 million teńge túrindegi moraldyq zalal tóleý ishinara qanaǵattandyryldy. Sottalýshy Tórebekovten jábirlenýshilerdiń paidasyna 20 million teńge kóleminde moraldyq shyǵyn óndirip alynsyn", - dedi sýdia.
Sot barysynda ol boijetkendi zorlady degen aiyppen kelispei, tek kisi óltirgenin ǵana moiyndaǵan edi.
Aiajan Edilovanyń ólimi boiynsha sot otyrysy 9 qarashada bastaldy. Is Almaty qalasynyń asa aýyr qylmystyq ister jónindegi mamandandyrylǵan aýdanaralyq sotynda jabyq rejimde qaraldy. Aiajannyń otbasynyń atynan sotqa qatysqan qorǵaýshy Qadirjan Ǵalymjanuly qylmystyq is 30 tomnan turatynyn jáne 30-ǵa jýyq saraptama ótkizilgenin málimdedi.
Eske salaiyq, 19 naýryzda Almaty qalasynyń turǵyny Aiajan Edilova jumystan shyǵyp, úiine oralmaǵan. Birneshe kúnnen keiin Almaty politsiia departamenti qyzdyń qaza tapqanyn habarlady. Jedel-izdestirý sharalaryn ótkizý barysynda boijetkenniń joǵalyp ketken kúni jańa tanysymen kezdesýge ketkeni anyqtalǵan. Bul týraly Almaty qalasy PD kriminaldyq politsiia basqarmasynyń bastyǵy Erkin Ińkárov málimdedi. Kúdikti - 1993 jyly týǵan azamat, Túrkistan oblysynyń turǵyny ustaldy.
