Almatyda ál-Farabi atyndaǵy Qazaq ulttyq ýniversitetinde QR Memlekettik hatshysy, Ábý Nasyr ál-Farabidiń 1150 jyldyǵyn daiyndaý jáne ótkizý jónindegi memlekettik komissiianyń tóraǵasy Qyrymbek Kósherbaevtyń qatysýymen birneshe is-shara ótti, dep habarlaidy "Ult aqparat".
Sharaǵa bilim jáne ǵylym ministri Ashat Aimaǵambetov, mádeniet jáne sport ministri Aqtoty Raiymqulova, QazUÝ rektory Ǵalym Mutanov, akademiialyq qoǵamdastyq pen BAQ ókilderi, ýniversitet oqytýshylary men stýdentteri qatysty.
Kezdesý aiasynda álemde tuńǵysh ret jaryq kórgen «Ál-Farabi» entsiklopediiasynyń tusaýkeseri ótti. Entsiklopediianyń mazmuny tarihi derekter, málimetter, geografiialyq nysandar, ómirbaiandyq málimetter, oishyldyń ómir joly men ǵylymi muralaryn (traktattary men olarǵa túsindirmeler), uǵymdar men terminder, arab-musylman Renessans kezeńindegi belgili ǵalymdardyń eńbekterin qamtidy.
Onda zamanaýi zertteýshiler men qazaqstandyq farabitanýshylar, sondai-aq, islam filosofiiasy, din, mádeniet, ǵylym jáne bilim máselelerimen ainalysatyn barsha ǵalymdar týraly bibliografiialyq málimetter keltirilgen.
«Bul - qazaq tilindegi biregei entsiklopediia. Munda ǵylymi ózekti materialdar, biyl josparlanǵan sharalar, búgingi sharaǵa qatysty materialdar toptastyrylǵan. Entsiklopediia adamnyń bilim kókjiegin keńeitedi. Bul eńbek odan ary da tolyqtyryla beredi. Birinshi kezekte jastarymyzdyń gýmanizm qaǵidattaryna negizdelgen Farabi murasyn jete túsingeni kerek. Jastarǵa qoljetimdi bolýy úshin biz bul eńbekterdi orys jáne aǵylshyn tilderine aýdarmaqpyz», - dedi ál-Farabi ortalyǵynyń direktory Bekjan Meiirbaev.
Dóńgelek ústel barysynda Qyrymbek Kósherbaev qazaqstandyq farabitanýshylarǵa pandemiiaǵa qaramastan sińirgen eńbegi úshin alǵysyn aitty.
