Biyl Aqsai, Úlken jáne Kishi Almaty ózenderiniń basseinderindegi 8 kóldi bosatý jumystary júrgiziledi. Bul týraly qalalyq Tótenshe jaǵdailar departamentiniń baspasóz qyzmeti málim etti, dep habarlaidy "Ult aqparat".
«Almaty mańynda 45 morenalyq jáne muzdyq kól ornalasqan, olardyń ishinde asa qaýiptisi – 12. Almaty qalasynyń aýmaǵynda selmen kúresýdiń eń tiimdi ádisi - morenalyq kólderdi bosatý boiynsha aldyn alý jumystaryn júrgizý. Biyl Aqsai, Úlken jáne Kishi Almaty ózenderiniń basseinderindegi 8 kóldi bosatý jumystary bastaldy»,-delingen habarlamada.
Qazirgi ýaqytta 8 kólde jumysqa 90 adam kirisýge daiyn. Býldozerler iske qosylady, evakýatsiialyq arnalardy tazartý jáne tereńdetý, sifon qubyrlaryn ornatý jáne montajdaý, sondai-aq sorǵy qondyrǵylaryn iske qosý boiynsha jumystar júrgizý josparda.
Osy maqsatta ónimdiligi joǵary 9 dana sorǵy, 2000 metr polietilen qubyrlary daiyndaldy, olar 2019 jyly Almaty qalasy ákimdiginiń qoldaýymen satyp alyndy.
«Morenalyq kólderdiń jai-kúiine baqylaý júrgizý úshin turaqty negizde jumys isteitin 9 beketke qosymsha – 12 biik taýly maýsymdyq beketter qoiylǵan. Sel qaýpi bar kezeńde barlyǵy 21 beket jumys isteitin bolady. Aita ketý kerek, 2020 jyly 7 morenalyq kólde aǵyzý kanaldary arqyly, olardy tazartý jáne tereńdetý jolymen, sondai-aq sifon qubyrlarynan – 5,2 mln.m3 sý tartyp shyǵaryldy»,-dep atap ótti vedomstvadan.
Álemdik tájiribeni eskere otyryp, «Tsifrlyq Qazaqstan» memlekettik baǵdarlamasy sheńberinde jáne «Smart-city» bazasynda ákimdiktiń qoldaýymen Kishi jáne Úlken Almaty, Qarǵaly jáne Aqsai ózenderiniń basseinderinde sel qaýpiniń avtomattandyrylǵan monitoringi júiesin engizý boiynsha jumystar júrgizilýde.
2019 jyly birinshi kezeńdi iske asyrý sheńberinde Kishi jáne Úlken Almaty ózenderi basseinderiniń morenalyq kólderinde, bógetterinde, sel oshaqtarynda jáne ózen arnalarynda 10 stantsiia salyndy, sondai-aq «Qazseldenqorǵaý» AQPTB MM jáne Almaty qalasynyń TJD baǵdarlamalyq qamtamasyz etý ázirlendi jáne dispetcherlik oryndar quryldy.
«Biyl qalǵan 21 stantsiianyń qurylysyn aiaqtaý josparda. Qaladaǵy sel qaýpiniń avtomattandyrylǵan monitoring júiesi naqty ýaqyt rejiminde gidrometeorologiialyq jaǵdaidy, morenalyq kólderdi baqylaýdy qashyqtyqtan qamtamasyz etýge múmkindik beredi. Almaty qalasyndaǵy sel jaǵdaiy erekshe baqylaýda», - delingen habarlamada.
