Fotokollaj: Liter.kz
Almatyda jyl basynan beri esirtki taratýmen ainalysqan 670 sait pen Telegram-arna anyqtalyp, buǵattaldy. Bul jumys politsiia men eriktilerdiń birlesken áreketiniń nátijesinde júzege asqan, dep habarlaidy Ult.kz.
Almaty qalalyq politsiia departamentiniń Esirtki qylmysyna qarsy is-qimyl basqarmasynyń jedel ýákili Sulýshash Dosbolovanyń aitýynsha, narkoresýrstar birneshe arna arqyly anyqtalady. Atap aitqanda, áleýmettik jelilerge júrgiziletin turaqty monitoring, azamattardyń shaǵymdary, senim telefonyna kelip túsken habarlamalar jáne «E-Ótinish» platformasy arqyly alynǵan málimetter eskeriledi.
Sonymen qatar zańsyz resýrstar jedel arnalar arqyly da anyqtalyp otyrady. Jinalǵan aqparat «Kibernadzor» júiesine jiberilip, sodan keiin saittardy buǵattaý sharasy qolǵa alynady.
Politsiia ókiliniń aitýynsha, keibir saittar birden jabyla bermeidi. Óitkeni olar arqyly esirtki taratýmen ainalysqan adamdardy anyqtaý úshin jedel jumystar júrgiziledi.
Sondai-aq politsiia turǵyndardy da bul iske beijai qaramaýǵa shaqyryp otyr. Eger internette esirtki satatyn saitty, Telegram-arnany nemese esirtkini jarnamalap jatqan akkaýnttardy baiqasańyz, arnaiy WhatsApp nómirine nemese Narko Shekteu Almaty Telegram-arnasyna habar berýge bolady.
Aita keteiik, Qazaqstanda esirtkige qarsy júrgizilip jatqan tsifrlyq tájiribe sheteldik mamandardyń da qyzyǵýshylyǵyn týdyryp otyr.
