Almaty ákimi Baqytjan Saǵyntaev eki aidyń ishinde salynǵan ekinshi modýldi infektsiialyq gospitaldi aralap kórdi, dep habarlaidy "Ult aqparat".
Gospitaldiń 30 jansaqtaý palatasynda 300 tósek-oryn bar. Barlyq tósekter meditsinalyq gazben jabdyqtalǵan.
Mundaǵy naýqastardyń jaǵdaiy «aqyldy» gospitaldyń avtomattandyrylǵan júiesi arqyly naqtyly ýaqyt rejiminde táýlik boiyna qadaǵalanady. Baǵdarlama qalanyń meditsinalyq aqparattyq júiesimen jáne PACS-daǵy barlyq rentgendik, KT jáne MRT sýretterindegi málimetterdiń tsifrlyq bazasymen biriktirilgen.
Klinika zamanaýi KT, rentgen, ÝZI apparattarymen jabdyqtalǵan jáne jeke qýatty zerthana da bar, munda saraptamanyń barlyq túrleri, onyń ishinde KVI-diń PTR diagnostikasy da jasalady.
Gospital qaýipsizdiginiń joǵary ekologiialyq klasy aýany tazartý júiesin, onyń ishinde jaýyn sýyn da zalalsyzdandyrýdy, meditsinalyq qaldyqtardy ýtilizatsiialaýdy qamtamasyz etedi.
Almaty ákimi Baqytjan Saǵyntaev dárigerlerdiń oidaǵydai jumys jasaýlary úshin qalanyń barlyq jaǵdailardy jasaitynyn atap ótti.
«Tórt aidyń ishinde biz eń zamanaýi qurylǵylarmen jabdyqtalǵan úsh aýrýhana saldyq. Bulardyń barlyǵy qala turǵyndarynyń igiligi úshin qoldanylýda», - dedi B. Saǵyntaev.
Sonymen qatar, ortalyqty abattandyrý kezinde 2 ga aýmaq kógaldandyryldy. Gazon jasalyp, qylqan japyraqty aǵashtar otyrǵyzyldy. B. Saǵyntaev Jasyl Almaty baǵdarlamasy aiasynda qosymsha aǵash kóshetterin otyrǵyzýdy tapsyrdy.
Buǵan deiin, Almatynyń Túrksib aýdanynda 500 oryndy infektsiialyq klinikanyń ashylǵandyǵy týraly habarlanǵan edi.
Sonymen qatar, taiaý ýaqytta 200 oryndy jeke kovidti gospitaldder ashylady, osylaisha jańa modýldi gospitaldi eskere otyryp, megapoliste KVI naýqastaryn emdeýge arnalǵan 1 myń jańa tósek-oryn paida bolady. 32 statsionardyń jalpy qýattylyǵy 7226 oryndy quraidy.
Aita ketsek, Almatynyń densaýlyq saqtaý júiesin modernizatsiialaýdyń úsh jyldyq baǵdarlamasy aiasynda meditsina uiymdarynyń materialdyq- tehnikalyq bazalary kúsheitilýde. Máselen, jyl basynan beri qarai 52 ÝZI apparaty, 38 rentgen, 269 ÓJJ apparaty, 5 KT, 2 MRT apparaty satyp alyndy. Sonymen qatar, 1300 kópsalaly meditsinalyq tósek, 250 tósek janyndaǵy monitor, zerthanalyq qurylǵynyń 43 birligi, 1050 ottegi kontsentratory alyndy.
Bulardan ózge, jedel járdem qyzmetiniń avtoparki 35 avtomashinaǵa jańardy, jyl sońyna deiin taǵy 100 jedel járdem kóligi alynatyn bolady. Birinshi eshelondaǵy segiz statsionarǵa meditsinalyq gazdyń 24 myń tósek-oryndyq ortalyqtandyrylǵan júiesi ornatylýda. 17 statsionarda aǵyn sýdy zararsyzdandyrý, al 13-de medqaldyqtardy ýtilizatsiialaý júieleri salynýda.
