Almatyda 4-7 maýsym aralyǵynda belgilengen shekteýlerdi buzǵan 36 jaǵdai anyqtaldy. Demalys kúnderi monitoringilik toptar kúsheitilgen rejimde jumys istedi, dep habarlaidy "Ult aqparat".
Almatyda monitoringilik top ókilderi maýsymnyń 4-inen 5-ine qaraǵan túni belgilengen shekteýdi buzǵan 19 jaǵdaidy anyqtady. Atap aitar bolsaq, Áýezov aýdanyndaǵy «Dostar saraiy» meiramhanasy 150 adamǵa arnalǵan úilený toiyn ótkizgen. Sol ýaqytta Bostandyq aýdanyna qarasty «Han Sarai» meiramhanasynda da toi boldy. Medeý aýdanynda «The Monkey» kafesinde 150-ge jýyq adam anyqtalsa, «Nebo» barynda 120-ǵa tarta qonaq jinalyp, zańbuzýshylyqqa jol bergen.
Al 5-6 maýsymda 14 jaǵdai tirkeldi:
Naýryzbai aýdanyndaǵy «Ilham» meiramhanasynda 150 qonaqqa eseptelgen saltanatty is-shara ótken.
Bostandyq aýdanynyń tekserýshileri «Hide Park» oiyn-saýyq parkiniń fýdkortynda 150-ge jýyq adamnyń jinalǵanyn anyqtady.
Medeý aýdanynda «Atmosfera» meiramhanasynda 150-ge jýyq kelýshi bolǵan. Sonymen qatar, «Leid Naid shoýda» 200 adam jinalǵan.
Jeksenbi kúni megapoliste 3 zań buzýshylyq tirkeldi:
«Dos» kompiýterlik klýbynda 40-qa jýyq adam otyrsa, Medeý aýdanyndaǵy «Pinta» barynda 100-ge jýyq turǵyn jinalyp, zańbuzýshylyqqa jol bergen.
Jalpy osy jyldyń 20 naýryzy men 7 maýsymy aralyǵynda belgilengen shekteýlerdi buzǵan 1088 jaǵdai anyqtaldy.
Almaty ákimdigi qala turǵyndary men qonaqtaryn karantin rejimin qatań saqtaýǵa, juqtyrý qaýpin azaitý maqsatynda saltanatty is-sharalarǵa, adam kóp jinalatyn jerden aýlaq bolýǵa shaqyrady.
