Foto: Polisia.kz
Almatyda burynǵy tergeýshi 14 qylmysty tirkeýden jasyryp, zańsyz áreket jasaǵany úshin sottaldy, dep habarlaidy Ult.kz.
Arnaiy prokýrorlardyń tergeýi boiynsha, Naýryzbai aýdany politsiia basqarmasynyń burynǵy qyzmetkeri qylmystyq quqyq buzýshylyqtar týraly málimet qolynda bolǵanyna qaramastan, olardy tirkeýden qasaqana jasyryp kelgen. Bul áreket Qylmystyq kodekstiń 433-babynyń 2-bóligi «Aýyr qylmystyq quqyq buzýshylyqty jasyrý» boiynsha qaraldy.
«Júrgizilgen keshendi tergeý áreketteri aiyptalýshynyń quqyqqa qarsy áreketin tolyq dáleldedi», – dep habarlady Almaty prokýratýrasy.
Sot úkimi boiynsha burynǵy tergeýshi kináli dep tanylyp, memlekettik qyzmette 3 jylǵa qyzmet atqarýǵa tyiym salyndy jáne 2 jylǵa bas bostandyǵy shekteldi. Sonymen qatar ol «politsiia leitenanty» arnaýly ataǵynan aiyryldy.
