Foto: Polisia.kz
Almaty qalasynda “STOP buzýshylyq” taqyrybynda aýqymdy jedel aldyn alý is-sharasy aiasynda joldarda jasyryn patrýldeý formaty engizildi, – dep habarlaidy Polisia.kz.
Bul – patrýldik politsiia qyzmetkerleriniń azamattyq kiimde, arnaiy belgileri joq avtokóliktermen jalpy kólik aǵynynda qozǵalyp, qyzmet atqarýyn bildiredi.
Negizgi maqsat – jol qozǵalysy erejelerin óreskel buzý derekterin anyqtaý, ásirese agressivti júrgizý faktilerin áshkereleý. Olardyń qatarynda kúrt jolaq aýystyrý, "shahmat" tásilimen júrý, basqa kólikterdi qysyp ótý jáne apattyq jaǵdailar týyndatý sekildi qaýipti áreketter bar.
Atalǵan quqyq buzýshylyqtardy tirkei otyryp, jasyryn patrýlder aqparatty naqty ýaqyt rejiminde jaqyn mańdaǵy patrýldik politsiia ekipajdaryna joldaidy. Keiin sol ekipajdar kólikti toqtatyp, júrgizýshini zańnamada belgilengen tártippen jaýapkershilikke tartady.
Bul tájiribe óziniń tiimdiligin kórsetti. Tek ótken demalys kúnderiniń ózinde Almaty qalasynda agressivti júrgizýdiń 28 deregi anyqtalyp, joly kesildi. Barlyq quqyq buzýshy jaýapkershilikke tartyldy.
PD málimetinshe, jasyryn patrýldeýdi engizý júrgizýshilerdiń tártibin arttyrýǵa jáne jol-kólik oqiǵalarynyń aldyn alýǵa, ásirese qaýipti júrgizý mánerinen týyndaityn apattardyń sanyn azaitýǵa baǵyttalǵan.
– Jasyryn patrýldeý – kózge birden túse bermeitin óreskel quqyq buzýshylyqtardy anyqtaýdyń tiimdi quraly. Politsiia qyzmetkerleri jalpy kólik aǵynynda júrip, júrgizýshilerdiń naqty minez-qulqyn baqylaidy. Ásirese agressivti júrgizý – "shahmat" tásilimen júrý, kúrt manevr jasaý jáne ózge de qaýipti áreketter basty nazarda. Mundai faktiler jedel túrde jaqyn mańdaǵy ekipajdarǵa jetkizilip, tiisti sharalar qabyldanady. Bizdiń mindet – tek jaýapkershilikke tartý ǵana emes, qaýipsiz júrgizý mádenietin qalyptastyrý, – dedi PD ákimshilik politsiia basqarmasynyń bastyǵy Abdinýr Tasybaev.
