Foto: heritageangus.ca
Almaty taýlarynda qar kóshkini júrý qaýpine bailanysty oblystyń tótenshe jaǵdailar departamenti eskertý jariialady. Almaty oblysy TJD-nyń málimetinshe, Almaty oblysynyń taýlarynda 26-28 naýryz kúnderi qar kóshkini júrý qaýpi saqtalady.
TJD azamattardan, týristerden jáne demalýshylardan qar kóshkinin týdyrýy múmkin bolǵandyqtan qarly betkeilerge shyqpaýdy, taýly jerlerde barlyq qaýipsizdik sharasyn saqtaýǵa shaqyrdy.
Aitý kerek, Ile-Alataý taýlarynyń ońtústik betkeiinde Eńbekshiqazaq, Talǵar jáne Qarasai aýdandarynda 55 kóshkin qaýpi bar ýchaske bar. Negizinen qar kóshkininiń túsýi temperatýra fonynyń joǵarylaýyna jáne jańbyr men qar túrinde mol jaýyn-shashynnyń túsýine bailanysty bolady.
Eske salaiyq, Almatydaǵy «Pioneer» taý shańǵy kýrortynyń mańynda qar kóshkini júrgenin habarlaǵanbyz.
Sondai-aq Tótenshe jaǵdailar ministrligi Almaty mańynda kóshkin qaýpiniń joǵary deńgeiin jariialady. Osyǵan bailanysty kóshkin qaýpi bar aimaqqa kirýdi shekteý úshin Úlken Almaty ózeniniń basseinindegi Aiýsaida (vizit ortalyǵy), Kishi Almaty ózeni tusyndaǵy «Edelveiste» jáne Shymbulaqta blokbeketter qoiyldy.
