20 qyrkúiek kúni keshke Almatynyń Alataý aýdanynda kisi qolynan qaza tapqan ýchaskelik politsiia inspektorlary kapitan Nurbol Baiǵaziev pen maior Darhan Súleevtiń zańger mamandyǵy boiynsha joǵary bilimi bar. Ekeýi de buǵan deiin qalada politsiia departamentiniń túrli bólimshesinde qyzmet etken, dep jazady Sputnik Qazaqstan agenttigi.
Almaty politsiiasynyń habarlaýynsha, 39 jastaǵy maior Darhan Súleev quqyq qorǵaý organdarynda 18 jyl qyzmet etken.
1982 jyly 4 qańtarda Jambyl oblysy Taraz qalasynda dúniege kelgen. 2002 jyly Ál-Farabi atyndaǵy Qazaq ulttyq ýniversitetin "Quqyqtaný" mamandyǵy boiynsha bitirgen. Politsiia qyzmetinde 2003 jyldyń qańtarynan bastap jumys isteidi.
Qazaqstan IIM Tarazdaǵy ýchilishesiniń kýrs bastyǵynyń orynbasary, keiin sol ýchilisheniń maman-inspektory bolyp jumys istedi. 2004-2006 jyldary Almaty qalasy Áýezov AIIB ýchaskelik politsiia inspektorynyń kómekshisi boldy. 2006 jyldan 2008 jylǵa deiin sol AIIB ýchaskelik politsiia inspektory qyzmetin atqardy. Sodan keiin jyl boiy belgili turǵylyqty jeri joq adamdar úshin qabyldaý-bólý ornynyń kezekshi bóliminiń inspektory bolǵan.
2009 jyldyń maýsymynan 2012 jyldyń aqpanyna deiin Almaty qalasy Bostandyq aýdany IIB ýchaskelik politsiia inspektory qyzmetin atqardy. Kelesi bes jarym jylda Almaty qalasy IID uiymdasqan qylmystyq áreketti qarjylandyrýǵa qarsy is-qimyl bóliminiń jedel ýákili bolǵan.
2017-2019 jyldary asa qaýipti qylmyspen kúres bóliminiń aǵa jedel ýákili boldy. 2019 jyldan 2020 jylǵa deiin Almaty qalasy PD kriminaldyq politsiia basqarmasynyń qaraqshylyqty ashý jáne qylmystyq toptardy áshkereleý bóliminiń jedel ýákili qyzmetin atqardy.
2020 jyldan 2021 jylǵa deiin Almaty qalasy IID esirtki qylmysyna qarsy is-qimyl basqarmasynyń jedel ýákili, IIM Esbolatov atyndaǵy Almaty akademiiasynyń joǵary oqý ornynan keiingi bilim berý fakýltetiniń magistranty bolǵan.
Almaty politsiia departamenti Alataý aýdanynyń ýchaskelik politsiia inspektory bolyp osy jyldyń tamyzynan bastap jumys istedi.
Ishki ister organdarynda qyzmet etken jyldar ishinde alty ret kótermelengen, onyń ishinde III dárejeli "Ishki ister organdaryndaǵy minsiz qyzmeti úshin" medalimen, sondai-aq "Qazaqstan politsiiasyna 25 jyl" tósbelgisimen marapattalǵan.
Úilengen, kámeletke tolmaǵan bes balasy bar, eń kishisi áli bir jasqa tolmaǵan.
Al 33 jastaǵy politsiia kapitany Nurbol Baiǵaziev quqyq qorǵaý organdarynda jeti jyl qyzmet etti.
1988 jyly 27 tamyzda Almaty qalasynda dúniege kelgen. 2011 jyly Almaty ekonomika jáne quqyq kolledjin, 2021 jyly IIM Esbolatov atyndaǵy Almaty akademiiasyn bitirgen. Bilimi boiynsha – zańger.
2014 jyldan 2020 jylǵa deiin Almaty qalasynyń mamandandyrylǵan kúzet qyzmeti basqarmasy memlekettik mekemesiniń bólimshelerinde inspektor jáne vzvod komandiriniń orynbasary laýazymynda jumys istedi. 2020 jyldyń mamyrynan 2021 jyldyń shildesine deiin Almaty PD Alataý aýdany ýchaskelik politsiia inspektorynyń kómekshisi boldy. Osy jyldyń shildesinde sol aýdannyń ýchaskelik inspektory laýazymyna taǵaiyndaldy.
Quqyq qorǵaý organdarynda qyzmet etken kezinde on úsh márte kótermelengen. "Úzdik qutqarýshy jaýynger", sondai-aq "Qazaqstan politsiiasyna 25 jyl" tósbelgilerimen marapattalǵan.
Úilengen, eki kámeletke tolmaǵan balasy bar.
Aita keteiik, 20 qyrkúiekte keshke Almatyda atys boldy. 54 jastaǵy er adam úiden shyǵarý týraly sot sheshimin oryndaýǵa kelgen sot oryndaýshysyna, politsiia qyzmetkerlerine jáne aýlada bolǵan ózge eki adamǵa ańshy myltyǵynan oq jaýdyrǵan. Nátijesinde bes adam qaza tapty. Eki politsiia qyzmetkeri, bir jeke sot oryndaýshysy jáne eki turǵyn. Olardyń biri - úidiń jańa iesi, ekinshisi - onyń tanysy.
1967 jyly týǵan kúdikti ustaldy. Ol 20 jylǵa nemese ómir boiyna deiin bas bostandyǵynan aiyrylýy múmkin.
