Foto: Almaty ákimdigi
Almatyda meditsinalyq týrizmdi damytýǵa arnalǵan halyqaralyq forým ótip jatyr. Bul jiynǵa densaýlyq saqtaý júiesiniń ókilderin, týristik sala mamandaryn jáne halyqaralyq seriktester qatysyp otyr. Bul týraly qalalyq týrizm basqarmasynyń ókilderi habarlady.
Forým barysynda halyqaralyq yntymaqtastyqty keńeitý, joǵary tehnologiialyq emdeý ádisterin engizý jáne meditsinalyq qyzmetterdiń básekege qabilettiligin arttyrý máseleleri talqylandy.
«Qazirgi tańda Qazaqstan, sonyń ishinde Almaty qalasy, Ortalyq Aziiadaǵy meditsinalyq týrizmniń jetekshi ortalyqtarynyń birine ainalyp keledi. Biz damyǵan týristik infraqurylymdy, sapaly meditsinalyq qyzmet kórsetýdi jáne qolaily kólik qatynasyn tiimdi ushtastyryp otyrmyz», - dedi shahardyń sheteldik patsientterdi tartýdaǵy áleýeti joǵary ekenin ataǵan Almaty qalasy Týrizm basqarmasy basshysynyń orynbasary Aqmaral Eshanova.
Onyń aitýynsha, qalada patsientterge keshendi qyzmet kórsetý júiesi jolǵa qoiylyp keledi. Sapardy uiymdastyrýdan ońaltýǵa deiin tizbek tolyq qarastyrylǵan. Al halyqaralyq standarttardy engizý sheteldik azamattardyń senimin arttyryp otyr.
Forým aiasynda Úndistanmen áriptestik máselesine erekshe nazar aýdaryldy.
«Almaty men Úndistan meditsinalyq týrizm salasyndaǵy yntymaqtastyqty damytýǵa turaqty qyzyǵýshylyq tanytyp otyr. Birlesken bastamalar tájiribe almasýǵa jáne zamanaýi meditsinalyq tehnologiialardy engizýge jol ashady», — dedi úndi delegatsiiasynyń ókili Shri Hoti Lal.
«Qazaqstan patsientter úshin tartymdylyqtyń negizgi alǵysharttaryna ie. Meditsinalyq kómektiń sapasy men qaýipsizdigi memleket tarapynan kepildendirilgen. Al densaýlyq saqtaý júiesi halyqaralyq standarttar men dáleldi meditsina qaǵidattaryna negizdelgen», - dedi salany damytýdyń júieli tásilin ataǵan Salidat Qaiyrbekova atyndaǵy Ulttyq ǵylymi densaýlyq saqtaýdy damytý ortalyǵy basqarma tóraǵasynyń orynbasary Sholpan Qarjaýbaeva.
Forým aiasynda onkologiia, transplantologiia jáne neirohirýrgiia salalaryn damytý, sondai-aq ozyq meditsinalyq tehnologiia engizý máseleleri qarastyryldy.
Qatysýshylardyń pikirinshe, halyqaralyq yntymaqtastyqty nyǵaitý Almatyǵa sheteldik patsientter legin arttyryp, meditsinalyq infraqurylymnyń odan ári damýyna serpin beredi.
