Almaty oblysynyń politseileri jappai tártipsizdik pen buzaqylyqtarǵa qatysy bar degen kúdikpen 700-den astam adamdy ustady, dep habarlaidy QazAqparat.
Almaty oblysynyń bas politseii, politsiia general-maiory Serik Kýdebaev oblysymyzdyń aýmaǵynda jappai tártipsizdiktiń, dúnie-múlikti qiratý men tonaý oryn alǵanyn aityp, qylmystyq áreketterge qatysy bar adamdardyń anyqtalyp jatqanyn jetkizdi.
«Jappai tártipsizdikke jáne dúnie-múlikti tonaý qylmystaryna qatysy bar degen kúdikpen jeti júzden astam adam politsiia organdaryna jetkizildi. Onyń 62-si ýaqytsha ustaý izoliatoryna qamaqqa alyndy. Derek boiynsha 65 qylmystyq is qozǵaldy. Arnaiy operatsiia barysynda qylmyskerderden júzge jýyq atys qarýy tárkilendi. Osy baǵyttaǵy maqsatty jumys odan ári jalǵasyp jatyr», - dedi oblystyq PD bastyǵy Serik Kýdebaev.
Esterińizge sala keteiik, qańtar aiynyń basynda radikaldy kúshter elimizdegi jaǵdaidy turaqsyzdandyrýǵa tyrysqan.
Almaty oblysynyń ortalyǵy Taldyqorǵan qalasyndaǵy keibir dúkender tonalyp, ákimshilik ǵimarattar búlingen.
Quqyqtyq tártipti qamtamasyz etý boiynsha qyzmettik boryshyn atqarý kezinde politseiler men ulttyq gvardiianyń áskeri qyzmetshisi qaza tapty.
«Oblystyq politsiia departamenti men Taldyqorǵan qalalyq politsiia basqarmasy qyzmetkerleriniń 80 paiyzǵa jýyǵy ártúrli dene jaraqatyn aldy. Olardyń bári óz ómirin qaterge tigip, qasietti antyna adal ekenin dáleldep, el tynyshtyǵyn qorǵaýda tabandylyq pen erlik minez tanytty», - dep tolyqtyrdy general-maior S. Kýdebaev.
Qazirgi ýaqytta oblystaǵy jaǵdaidy politseiler men áskeriler tolyq baqylaýǵa alǵan.
Taldyqorǵan qalasynyń jan-jaǵyna 4 blokpost, al qala ishine birneshe jerge blokbeketter qoiylǵan.
Ol jerlerde politseiler men áskeri qyzmetshiler táýlik boiy kezekshilik atqarýda.
Politsiia basshysynyń aqparatyna sáikes, oblys ortalyǵynyń kóshelerinde 35 politsiia kóligi úzdiksiz avtopatrýldeidi.
Kúndiz tártip saqshylary men Ulttyq ulan sarbazdarynan qurylǵan 20 jasaq jaiaý patrýldep júr.
