Almaty oblysynyń ákimi Amandyq Batalov Jambyl Jabaev pen Muqaǵali Maqataevtyń mereitoilary qalai atalyp ótetinin aityp berdi, dep habarlaidy QazAqparat.
«Jambyl atamyzdyń mereitoiyna ótken jyldan bastap daiyndaldyq. Eń birinshi onyń jatqan jeri, mavzoleii, mýzeii jáne alańyn abattandyrýǵa qarjy bólip, qalpyna keltirildi. Ol jerge kóp adam barady, taǵzym jasaidy. Sondyqtan, osy jumystardy aiaqtadyq. Jambyl atamyzdyń 30 tomdyq kitabyn shyǵarýǵa daiyndalyp jatyrmyz, oǵan qarajat bólindi. Ýálihan Qaiyrjan degen jazýshynyń usynysymen «Jambyl» kitaby shyǵaryldy. Odan basqa, Jambyl týraly spektaklder qoiylyp, «Jetisý» telearnasynda arnaiy baǵdarlamalar kórsetilip jatyr», - dep jaýap berdi A. Batalov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda tilshi suraǵyna.
Óńir ákimi Muqaǵali Maqataevtyń 80 jyldyq toiynda birqatar jumys atqarylǵanyn atap ótti. Biylǵy 90 jyldyǵyna da Qarasaz aýylynyń jolyn, Mádeniet úiin, aqyn mýzeiin qalpyna keltirip, óner mektebin ashý usynysy qolǵa alynǵan.
«Ózderińiz biletindei, Raiymbek aýdany ashylyp, Narynqol aýyly ortalyq atandy. Sol jerde halyqpen kezdeskende úlken kisiler Narynqoldyń dál ortasyna saiabaq jasap, Muqaǵali Maqataevtyń eskertkishin qoiý týraly usynys jasady. Qazir saiabaq jerin aldyq, 2-3 úidi satyp alyp, basqa jaqqa kóshirdik. Kúzge qarai aqyn eskertkishi ornatylady, saiabaq ashylady. M. Maqataevtyń da kitaby shyǵarylyp, aqyndarmen kezdesý sharalary ótip jatyr», - dedi A. Batalov.
