Qazaqstan halqy Assambleiasy Almaty oblysyndaǵy jappai tóbeleske bailanysty málimdeme jasady, dep habarlaidy "Ult aqparat".
Búgin Assambleianyń resmi ókili Maiia Bekbaeva arnaiy málimdeme taratty.
«Qurmetti qazaqstandyqtar! Keshe kúndizgi ýaqytta Almaty oblysy Panfilov aýdany Penjim aýylynyń jergilikti mektebinde eki joǵary synyp túlekteriniń arasynda kelispeýshilik týyndap, oqýshylar arasynda tóbeleske ulasty.
Ókinishke qarai, tóbeles barysynda oqýshylardyń biri zardap shekti, oǵan qajetti kómek kórsetildi. Ol qazir aýrýhanada dárigerlerdiń baqylaýynda.
Keshke aýylda jergilikti turǵyndar jinalyp, mektep aýmaǵynda bolǵan jappai tóbeles saldarynan atalmysh jaǵdaidyń oryn alýyna bailanysty narazylyq bildirdi.
Sonymen qatar keibir jasóspirimder men jastar emotsiianyń jáne arandatýshylardyń áserinen birneshe jeke úi men kólikterdiń áinegin syndyrǵan.
Aýyl turǵyndary arasynda, etnosaralyq negizde qandai da bir janjaldyń, ásirese qaqtyǵystardyń joq ekendigin jáne oǵan jol berilmeitindigin erekshe atap ótkim keledi.
Jergilikti turǵyndar - qazaqtar da, uiǵyrlar da kóp jyldar boiy birge turyp keledi, bir biriniń dostary men kórshileri. Onyń barlyǵy shyn júrekten beibitshilik pen tynyshtyqty qalaidy.
Jergilikti atqarýshy jáne quqyq qorǵaý organdarynyń ókilderi, Qazaqstan halqy Assambleiasy Tóraǵasynyń Qoǵamdyq orynbasary Zákirjan Kúziev, QHA hatshylyǵy jáne oblystyq ishki saiasat basqarmasynyń etnosaralyq qatynastar máseleleri jónindegi bóliminiń basshysy M.Batyrbekov jáne «Qoǵamdyq kelisim» KMM direktory qoǵamdyq tártipti qamtamasyz etýde.
Olarmen birge aqsaqaldar, jigit-beshi, azamattyq qoǵam ókilderi jumys isteidi.
Qazirgi ýaqytta Penjim aýylyndaǵy jaǵdai turaqty» - dep jazdy ol Facebook jelisindegi paraqshasynda.
Esterińizge sala keteiik, ótken táýlikte Panfilov aýdanyndaǵy Penjimde oqýshalar arasynda jappai tóbeles bolǵanyn habarlaǵan bolatynbyz.
Almaty oblystyq politsiia departamenti baspasóz qyzmetiniń resmi aqparatyna sáikes, atalǵan fakti boiynsha QR QK 293-babynyń 2-bóligi boiynsha qylmystyq is qozǵaldy.
