Almaty oblysy ákiminiń birinshi orynbasary Lazzat Turlashovtyń tóraǵalyǵymen tótenshe jaǵdailardyń aldyn alý jáne joiý máselesi boiynsha komissiia otyrysy ótti. Jiyn selektorlyq rejimde ótti. Shtab otyrysyna tótenshe jaǵdailar departamentiniń qyzmetkerleri, quqyq qorǵaý salasy men barlyq aýdan, qala ákimderi qatysty.
Kún tártibinde sel, syrǵyma qaýpi bar kezeńderge daiyndyq, sýǵa shomylý maýsymy kezinde azamattardyń qaýipsizdigi, órttiń aldyn alý, gaz sharýashylyǵyn paidalaný, gaz tehnikalyq inspektsiia qurý máseleleri qaraldy.
Birinshi másele boiynsha Almaty oblysy TJD zilzalalardyń qaýip-qaterin azaitý jáne azamattyq qorǵaý salasyndaǵy baqylaý basqarmasy bastyǵy orynbasarynyń mindetin atqarýshy, azamattyq qorǵaý podpolkovnigi Q.Altynbekov baiandama jasady. Ol óz sózinde kóktemgi kúnniń kúrt jylýyna bailanysty qaýipti aimaqtarǵa 132 reidtik baqylaý jasap, 1 ret aerovizýaldy tekserý júrgizgen. Tekserý barysynda syrǵyma jaǵdaiy turaqty, syrǵyma qaýpi bar ýchaskelerde tas kóshkinderi baiqalmaǵan. Taýly aimaqtarda da jaǵdai qalypty ekenin baiandap ótti.
Ekinshi másele boiynsha baiandamashy oblystyq TJD bastyǵynyń orynbasary, polkovnik S. Turarov sý aidyndaryndaǵy tótenshe jaǵdailar boiynsha tolyq aqpar berdi. Sýǵa shomylý maýsymynda adamdardyń qaýipsizdigin saqtaý máselesi boiynsha jumys atqarylatynyn jetkizdi. Departament ókiliniń aitýy boiynsha, kóptegen keleńsizdikter men qaiǵyly oqiǵa demalýshylardyń tehnikalyq qaýipsizdikti saqtamaý saldarynan týyndaitynyn jetkizdi. Olar belgilenbegen jáne sýǵa shomylýǵa bolmaityn, arnaiy qutqarýshy top joq jerlerge sýǵa túsý, ishimdik iship shomylý jáne jas balalardy qaraýsyz qaldyrýdyń saldarynan qaiǵyly jaǵdaiǵa dýshar bolatynyn tilge tiek etti. Sondai-aq, demalys oryndarynyń ielerine saqtyq sharasyn kúsheitip, tótenshe jaǵdaidyń aldyn alý jáne boldyrmaý maqsatynda turaqty shara atqarýdy tapsyrǵandyǵyn aitty.
Budan keiin úshinshi jáne tórtinshi másele boiynsha arnaiy mamandar sóz alyp, órt qaýipsizdigi men ýly gazdan zardap shekkender boiynsha tolyq aqpar berdi. Qyzmetkerler arnaiy reidtik shara ótkizip, BAQ ókilderinde eskertý men turǵyndarǵa arnalǵan paraqshalar taratylǵanyn aityp berdi.
Jiyn sońynda aýdan ákimderi atalǵan máseleler boiynsha ózderiniń jumystaryn baiandap, aldaǵy ýaqytta da tótenshe jaǵdaidyń aldyn alý maqsatynda turaqty jumys júrgizetindigin jetkizdi. Oblys ákiminiń birinshi orynbasary L. Turlashov joǵaryda atalǵan máseleler turǵyndar qaýipsizdigine tikelei qatysty ekenin, osyǵan bailanysty olardy erekshe baqylaýda ustaý qajettigin atap ótti. Osyǵan bailanysty oblystyń tiisti basshylaryna jáne aýdan ákimderine jumysty kúsheitýdi tapsyrdy.
Rishad TURǴANBAEV
