Destrýktivti dini baǵytty ustanýy múmkin QR eki azamat ustaldy, dep habarlaidy QazAqparat Ulttyq qaýipsizdik komitetine silteme jasap.
Ulttyq qaýipsizdik komiteti ShQ Almaty oblysy boiynsha departamenti 5-6 qańtar aralyǵynda Úshbulaq aýylynyń mańynan zańsyz aktsiialarǵa qatysy bar degen kúdikpen destrýktivti dini baǵytty ustanýy múmkin QR eki azamatyn qolǵa túsirdi. Olardan dini ádebietter tabylyp, qazirgi ýaqytta ustalǵandardyń ekstremistik dini uiymdarǵa qatystylyǵy tekserilýde.
Úlken Almaty kóliniń mańynda jeke bastaryn kýálandyratyn qujattary joq «Toiota» markaly avtokóligin mingen 5 azamat ustaldy. Avtokólikti tekserý barysynda: 7 oǵy bar 12 kalibrli vinchester, 1 oǵy bar travmatikalyq tapansha, qan juqqan pyshaq jáne 600 000 teńge aqshalai qarajat tabyldy. Olardyń Almaty qalasyndaǵy jappai tártipsizdikterge jáne qarý-jaraq dúkenin tonaýǵa qatystary barlyǵy anyqtaldy.
Sondai-aq Kishi Dehan eldi mekeninde Almaty qalasyndaǵy tártipsizdikterge qatysqan 19 adam anyqtaldy. Jedel top ustalǵandarmen suraý jumystaryn júrgizýde.
7 qańtarda QR QK bólimshelerimen birlesip, Almaty jáne Taldyqorǵan qalalaryndaǵy qoǵamǵa qarsy aktsiialarǵa qatysy bolýy múmkin 184, sondai-aq Memlekettik shekarany qorǵaý salasyndaǵy QR zańnamasyn buzýshy 41 adam ustaldy. 13 birlik atys qarýy, 185 birlik oq-dári, 8 uialy telefon, 900 myń teńgege jýyq aqsha qarajaty jáne 100 myń AQSh dollary tárkilendi. Urlanǵan 1 avtokólik ustaldy.
13 qańtarda tártipsizdikterge qatysy bar degen kúdikpen QR 26 azamaty, sondai-aq qarýdy zańsyz saqtaǵany úshin QR 5 azamaty anyqtalyp, ustaldy. 6 birlik atys qarýy tárkilendi.
Shekara qyzmetiniń bólimsheleri turaqty jaýyngerlik ázirlikte jáne shekara kúzeti kúsheitilgen rejimde júzege asyrylýda.
