Almaty oblysynda balabaqshanyń terezesinen 4 jastaǵy bala shatyrǵa shyǵyp ketip, aman qaldy. Oqiǵa Qapshaǵai qalasyndaǵy «Aqdidar» balabaqshasynda bolǵan, dep habarlaidy QazAqparat.
Balabaqsha shatyryna 4 jastaǵy balanyń shyǵyp ketkeni túsirilgen beinejazba birden áleýmettik jelige tarap, halyqtyń narazylyǵyn týdyrdy.
Shatyrdyń ústinde júrgen búldirshindi dereý tárbieshi baiqap, balanyń artynan ózi de shatyrǵa shyǵyp, kómekke umtylǵan. Balabaqsha meńgerýshisiniń sózinshe, bala jatyn bólmeniń terezesin ashyp, syrtqa shyǵyp ketken. Oqiǵa qyrkúiektiń ekisi kúni tańǵy saǵat 8:15-ter shamasynda bolǵan.
«Bala ómirine qaýip tóngen joq. Osy oqiǵadan keiin balanyń anasyn shaqyryp, bolǵan oqiǵa jaily aittyq. Ol kisi balasynyń mazasyz ekenin, erke ekenin jetkizdi. Úide de osyǵan uqsas oqiǵalardyń bolǵanyn aityp berdi. Top tárbieshisine tártiptik jaza qoldanyp, qatań sógis berildi. Al balabaqsha eki qabattan turady. Ekinshi qabatta 8 top ornalasqan. Sol toptardyń terezesine temir tor qoiýǵa tótenshe jaǵdai komiteti ruqsat bermeidi», - dedi «Aqdidar» balabaqshasynyń meńgerýshisi Gúlzada Aqynbekova.
«Aqdidar» — memlekettik balabaqsha. Bul jerde 370 bala tárbielenip jatyr. Al tárbieshiler sany - 35.
