Óńirlik biznesti damytý úshin «Almaty biznes-2025» biryńǵai baǵdarlamasy ázirlendi.
Qazir biz negizgi 5 baǵytta jumystar atqaryp jatyrmyz. Bul týraly Almaty qalasynyń ákimi Baqytjan Saǵyntaev Almaty kásipkerleriniń V konferentsiiasynda aitty.
Ákimniń aitýynsha, Almatydaǵy salyqtyń 64% shaǵyn jáne orta biznesten túsedi. Sondyqtan qala jeke kásipkerler esebinen kún kórýde.
«Qalada 185 myń kásiporyn bar, iaǵni elimizde tirkelgen ár jetinshi kásiporyn Almatyda ornalasqan. Sondyqtan biz qalamyzda biznestiń damýyna múddelimiz ári ákimdik tarapynan qoldaý jasai beremiz. Osy turǵyda qazir Almatynyń óńirlik biznesin damytý úshin «Biznes-2025» biryńǵai baǵdarlamasy ázirlendi. Qazir biz negizgi 5 baǵytty anyqtadyq, ol kedergilerdi joiý, biznesti qarjylandyrýdy arttyrý, infraqurylymdy damytý jáne investitsiialyq jobalardy keshendi súiemeldeý. Bul quraldardyń barlyǵy aldymen shaǵyn jáne orta biznesti damytýǵa baǵyttalatyn bolady», - dedi ol.
Sonymen qatar, ol aldaǵy ýaqytta IT, meditsina, bilim berý, áleýmettik-ekonomika, týrizm salalaryna belsendi qoldaý jasalatynyn aitty.
«Osy baǵytta biz «Qoldaý» kásipkerlik ortalyǵyn ashtyq. Qalanyń alty aýdanynda onyń bólimsheleri bar. Onda kelýshiler bir tereze qaǵidaty boiynsha kásipkerlik boiynsha keńester ala alady», - dedi qala ákimi.
Konferentsiia barysynda óńirlik biznesti qoldaýdyń perspektivalyq baǵyttary, kásipkerlerdiń Almatydaǵy biznes-ahýalyn jaqsartý máseleleri talqylyp jatyr.
