Almatyda Baým baǵynda qarttar QR táýelsizdiginiń 30 jyldyǵyna orai sporttyq shara ótkizdi, dep habarlaidy QazAqparat.
Sporttyq sharany Almatydaǵy Túrksib aýdandyq belsendi uzaq ómir ortalyǵynyń qyzmetkerleri uiymdastyrdy.
«Búgingi shara el táýelsizdiginiń 30 jyldyǵyna arnalady. Bizdiń ortalyǵymyz qart kisilerdiń uzaq ómir súrýine barynsha jaǵdai jasaýmen ainalysady. Ortalyqqa kelip júrgen 30 jýyq qart kisi el táýelsizdiginiń mereitoiyna óz úlesterin qosty. Bul joba Almatyda 2018 jyldan beri jumys istep keledi. Bizdiń aýdanda ortalyq 2019 jyly ashylǵan bolatyn. Bul jerge 60 jastan asqan kisiler keledi. Zeinet jasyndaǵy azamattar skandinav tásilimen júrip, deneni shynyqtyrý arqyly emdelip, iogamen ainalysady. Ortalyqta dárigerler, psihologtar, zańgerler keńes beredi. Joba boiynsha bizde kúnine 100 adamǵa kómek kórsetiledi. Olardyń kópshiligi Seifýllin atyndaǵy saiabaqta sportpen shuǵyldanady», - dedi ortalyqtyń jetekshisi Samat Bisenov.
Búginde bul ortalyqta túrli baǵytta 15 instrýktor jumys isteidi.
«Osynda keletin zeinetkerler bizdiń ortalyqqa rizashylyǵyn bildirip jatyr. Sebebi, 1,5 jylda olardyń densaýlyǵy jaqsaryp, kóńil kúileri kóterildi. Dos taýyp, aralasatyn orta tapty. Bizdiń esigimiz barlyq kelýshilerge ashyq», - dedi Samat Bisenov.
68 jastaǵy almatylyq Gúlnar Qablaqatova skandinav tásilimen júrýge 4 jyldan beri qatysyp keledi.
«Ortalyqtyń arqasynda jaqsy orta taptym. Meniń ómirimde qiyn jaǵdai bolyp, anam qaitys bolǵan edi. Sol sary ýaiymnan shyǵý úshin osynda keldim», - dedi áiel.
Ǵylymi derekterge sáikes, Skandinav júrisi sport túri retinde Finliandiiada paida bolǵan.
Bul sport túri adam bulshyqetiniń 90 paiyzyn jumys istetedi eken.
