Almaty qalasynyń Mobildilik basqarmasy qoǵamdyq kólikterdiń 70 júrgizýshisi jumystan qandai sebeppen shyǵarylǵanyn túsindirdi, dep habarlaidy "Ult aqparat".
Qalalyq mobildilik basqarmasynan atap ótkendei, 5 311 júrgizýshi Almaty qalasy boiynsha qoǵamdyq kólik júrgizýshileriniń biryńǵai málimetter bazasynyń tizimine engizildi. Búginde onyń 3693-i naqty jumys isteidi.
«Qara tizimde» 124 júrgizýshi bar. 2020 jyldyń segiz aiynda 559 zań buzýshylyq tirkelgen, 70 júrgizýshi jumystan shyǵaryldy», - dep habarlady basqarmadan.
Qoǵamdyq kólik júrgizýshileri kóbine jol qozǵalysy erejelerin júieli túrde buzǵany úshin jumystan shyǵarylady.
«Atap aitsaq, jol qozǵalysyna kedergi keltirgeni úshin, birneshe ret jol-kólik apatyn jasaǵany úshin, aialdamada sebepsiz uzaq ýaqyt toqtap turǵany úshin, sondai-aq «Onai» qurylǵysyn júieden ruqsatsyz ajyratyp, jolaýshylarǵa bilet bermegeni úshin jáne qoǵamdyq kóliktegi adamdarǵa dórekilik tanytqany úshin, avtobýsta birneshe ret temeki shekkeni úshin jumystan bosatylady»,– dep jaýap berdi Almaty qalalyq Mobildilik basqarmasynan.
