Jumystan shyǵarylǵandar jaǵdaidy retke keltirýdi surap, Aviatsiialyq kólik prokýratýrasyna júgingen.
"Kadr bóliminen qońyraý shalyp, jeti adam edik, bárin kadr bólimine shaqyrdy. Onda barǵanda, mór qoiylǵan eńbek kitapshalary daiyn boldy. Onda óz erkimizben ketkenimiz kórsetilgen. Jumystan shyǵarýǵa buiryq, ótinish daiyn turdy.
"Qandai negizde ketip jatyrmyz" degen suraqpen aryzǵa qol qoidyq. Bizge: "Senderge eshkim kómektese almaidy, jumystan ketý kerek" dedi. Men jáne bólimshedegi tórt maman ótinish jazyp, jumystan shyqtyq", - deidi "Almaty halyqaralyq áýejaiy" AQ júk tasymaldaý qyzmetiniń burynǵy qyzmetkeri Galina Takobaeva.
Burynǵy jumysshylar "áitpese bap boiynsha jumystan shyǵaramyz" dep qorqytqanyn alǵa tartady. Kóp uzamai ketkenderdiń ornyna jańa qyzmetkerler alynǵan. Burynǵy qyzmetkerler áýejaida 10 jyldan asa jumys istegenin aitady. Báriniń aviatsiialyq bilimi bar. Keibireýler úshin zeinetkerlikke shyǵýǵa az-aq ýaqyt qalǵan jáne jańa jumysqa turý óte qiyn bolady. Olar jumysqa qaita alýdy nemese basqa nusqa usynýdy talap etedi.
Áýejaidyń ózinde qyzmetkerler óz erkimen jumystan ketkenin jazdy.
"Almaty halyqaralyq áýejaiynyń burynǵy qyzmetkerleriniń sońǵy úndeýine sáikes, "Almaty halyqaralyq áýejaiy" AQ-na qoiylǵan bul talaptardyń negizsiz ekenin habarlaimyz. Qyzmetkerler óz bastamalarymen jumystan shyǵaryldy. Olarmen eńbek sharty Qazaqstan Respýblikasynyń 49-baby 5-tarmaqshasyna sáikes, Eńbek kodeksi aiasynda buzyldy", - dedi oqiǵaǵa qatysty áýe ailaǵy baspasóz qyzmetiniń jetekshisi Nailia Jabagina.
