Búginen bastap Almaty halyqaralyq áýejaiynda Ashyq qosymshasy jumys istep jatyr, dep habarlaidy "Ult aqparat".
Ashyq mobildi qosymshasy meiramhanalar men demalys oryndarynan bólek, Almaty áýejaiyna da ornatyldy. Búginen bastap jolaýshylar ushaqqa otyrmas buryn, óz statýsyn skanerleý arqyly anyqtap, áýejai qyzmetkerine kórsetýi tiis.
Aita keteiik, jolaýshylarǵa statýs «PTR-zertteýlerdiń biryńǵai integratsiialyq portaly» jáne «Qazaqstan Respýblikasy Densaýlyq saqtaý ministrliginiń COVID-19 baqylaý ortalyǵy» aqparattyq júielerimen salystyrý negizinde beriledi.
«Jasyl» – júrip-turýynda shekteý joǵyn bildiredi, mundai adam bazada COVID-19 indetine PTR-testileýi teris nátije kórsetken paidalanýshy bolyp sanalady.
«Kók» — aýrý juqtyrǵan adamdarmen bailanysta bolǵan adamdar esebinde joq, PTR-test talap etiletin jerlerden basqa kez kelgen orynda erkin qozǵalý degendi bildiredi.
«Sary» – bailanysta bolǵan adamdarǵa beriletin mártebe. Olarǵa azyq-túlik alýǵa nemese úidiń janyndaǵy dárihanaǵa barýǵa ruqsat etilgenmen, basqa qoǵamdyq oryndarǵa barýyna tyiym salynady.
«Qyzyl» statýs — PTR-test tapsyryp, koronavirýs anyqtalǵan adamǵa beriledi. Mundai mártebe ieleri úide oqshaýlaný rejimin qatań saqtaýy tiis.
«Qyzyl» nemese «sary» tús mártebesin kórsetken jolaýshylar ushaq bortyna jiberilmeidi. Osylaisha shekteý qoiý arqyly, ózgelerdiń qaýipsizdigin qamtamasyz etýge múmkindik beredi deidi mamandar. Al,18 jasqa tolmaǵan balalarǵa qosymshany paidanbai erkin kirýine ruqsat.
Almaty halyqaralyq áýejaiynyń baspasóz hatshysyNatalia Sokolovanyń aitýynsha, áýejaida «Ashyq» mobildi qosymshasy 16 mamyrdan bastap pilottyq rejimde bastalǵan. Osy aralyqta 24 adamda qyzyl tús, al 15 adamda sary belgi anyqtalǵan. Olardyń barlyǵy áýejaiǵa ótkizilmedi. Bul rette jolaýshylarǵa áýe kompaniiasy bilet qunyn tolyqtai ótep berýi kerek nemese ushý ýaqytyn basqa kúnge aýystyrýy qajet.
«Jobany ázirleýshiler barlyq tehnikalyq tustaryn da qarastyrǵan. Qazir júie jaqsy jumys istep tur. Eshqandai aqaýlar bolmaidy dep senemiz. Júie isten shyqqan jaǵdaida, biz shyǵaryp salýshylarǵa emes, birinshi kezekte jolaýshylardy kirgizýge basymdyq beretin bolamyz. Odan bólek, biz óz tarapymyzdan jolaýshylardy uzaq kúttirmeý úshin qosymsha kireberister ashtyq, dálizder uiymdastyrdyq», – dedi «Almaty halyqaralyq áýejaiy» AQ baspasóz hatshysy.
