Almaty ákimi Baqytjan Saǵyntaev qala jurtshylyǵymen kezdesýdi dástúrge ainaldyrdy. Búgin Medeý aýdanynyń turǵyndarymen kezdesip, olardy tolǵandyrǵan máselelerdi talqylady, dep habarlaidy QazAqparat.
Megapolisti damytýdyń basty máseleleri jaily aita kele, ákim shaǵyn jáne orta bizneske qoldaý kórsetýdiń mańyzyna erekshe toqtaldy. Onyń aitýynsha, halyqtyń úshten biri kásipkerlikpen ainalysady. Ári ShOB qalanyń jalpy óńirlik óniminiń 40%-yn beredi, qala biýdjetiniń 60%-yn qalyptastyrady.
Kásipkerlikti qoldaý sharalarynyń arasynda «Almaty» áleýmettik kásipkerlik korporatsiiasyn túrlendirý, «Almaty Invest» Investitsiialardy tartý ortalyǵynyń qurylýy, qalanyń 6 aýdanynda filialy bar «Qolday» kásipkerlik ortalyǵyn aitýǵa bolady. Shaǵyn jáne orta biznesti nesielendirýge arnalǵan, qalanyń qaq ortasynda 7 paiyzdyq, shetinde 2 paiyzdyq differentsiialanǵan mólsherleme saiasatyn ustanatyn «Almaty Finance» kompaniiasy jáne «Almaty» shaǵyn nesie uiymy paida boldy.
«Almaty biznes-2025» baǵdarlamasy boiynsha kásipkerler oqytylýda.
Ákim qarjydan bólek, kásipkerlerge infraqurylymdyq sheshimderi bar logistika boiynsha da qoldaý kórsetiletinin aitty. Mysaly, Baitursynuly jáne Qonaev kóshelerimen júretin velojolaqtar baǵdary da osy maqsatta ózgertildi.
Baqytjan Saǵyntaev áleýmettik jeli qoldanýshylarynyń birazy ákimdiktiń bastamalaryn ádeii burmalap túsindiretinine shaǵymdandy. Sońǵy kezde «Timiriazev kóshesinen BRT baǵdary alynady, Panfilov kóshesiniń kontseptsiiasy qaita qaralady, buzylǵan qorshaýlar qaita qalpyna keltiriledi, qala kóshelerinde kólikke arnalǵan jolaqtar joiylady» degen siiaqty sybystar tarady.
«Kei jýrnalister maǵan keledi, áleýmettik jelide jazady. Osynyń bári bos sóz ekenin aitqym keledi. Bárin jappai jabý, joiý, qurtý eshkimniń oiynda joq. Osyndai sybystardy taratyp júrgender bosqa haip jasap júr», - dedi ákim.
