Almaty ákimi Baqytjan Saǵyntaev ákimdiktiń mindeti – aldaǵy úsh jylda mektepter men balabaqshalardy kóbeitý ekenin aitty, dep habarlaidy QazAqparat tilshisi.
«Birlesken jumysymyzdyń maqsaty – «Sheti joq qala» qaǵidasy boiynsha barlyǵyn sapaly jáne zamanaýi bilimmen qamtamasyz etý. Men Almatynyń barlyq aýdandaryn araladym. Túrli mektepterdi kórdim. Qala turǵyndary bilim sapasyn arttyrýǵa nietti. Sondyqtan, Nazarbaev Ziiatkerlik mektepteriniń tájiribesin qaladaǵy barlyq mektepterde qoldaný kerek», - dedi Baqytjan Saǵyntaev bilim berý júiesi qyzmetkerleriniń forýmynda.
Sondai-aq, ákim 2013 jyldan beri qoldanylyp kele jatqan kompiýterlik bazany jańartyp, mekteptiń materialdyq-tehnikalyq negizin jańǵyrtý qajettigin atap ótti.
«Ol úshin bilim berý basqarmasyna barlyq mektepterde aýdit júrgizip, olardy jańartýdyń úsh jyldyq baǵdarlamasyn ázirleýdi tapsyrdym. Prezident Qasym-Jomart Toqaev mindettegendei, bilim berý salasyndaǵy teńsizdikti joiý mańyzdy. Ákimdiktiń basty mindeti – qaladaǵy barlyq mektepterge birdei jaǵdai jasaý», - dedi ákim.
Baqytjan Saǵyntaevtyń sózinshe, qalanyń ortalyǵyndaǵy nemese shetindegi bolsyn, olardyń ata-anasynyń mártebesi men jaǵdaiyna qaramastan barlyq bala sapaly bilim alýy tiis.
«Bizdiń mindetimiz – aldaǵy úsh jylda qala turǵyndaryna qolaily jerde mektepter men balabaqshalardy keńeitý. Qala turǵyndary ortalyqtaǵy jáne shettegi bilim berý sapasy men deńgeiin teńestirýdi ǵana emes, jańa mektepter men balabaqshalar ashýdy qalaityndaryn jetkizdi», - dep túiindedi Baqytjan Saǵyntaev.
Eske salaiyq, Almaty ákimi jas muǵalimderge aqshalai kómek bóledi.
