Biznestegi problemalyq máseleler Qazaqstan Respýblikasy Premer-Ministriniń birinshi orynbasary Á. Smaiylovtyń tóraǵalyǵymen ótken jiynda talqylandy.
Bul týraly QazAqparat Úkimettiń baspasóz qyzmetine silteme jasap habarlaidy.
Jiyn barysynda «Atameken» UKP ókilderi kásipkerler kótergen birqatar máselelerdi ortaǵa saldy.
Atap aitqanda, kólik tasymaly salasyn sýbsidiialaý jáne tozyǵy jetken avtobýstardyń máseleleri sóz boldy.
Biylǵy jyly ákimdikter qalalyq marshrýttardy sýbsidiialaýǵa 2020 jylmen salystyrǵanda 75 paiyzǵa artyq qarajat bóldi.
Premer-Ministrdiń orynbasary tiisti ministrlikke toqsan saiyn ákimdikterdiń qalalyq jolaýshylar kóligin damytý jónindegi is-sharalar keshenin jáne sýbsidiialaýdy qamtamasyz etý boiynsha qoldanystaǵy zańnamany iske asyrýdy tekserý jumysyn jalǵastyrýdy tapsyrdy.
Biylǵy jyldyń qyrkúieginde Qazaqstan Respýblikasynda avtomobil kóligimen halyqaralyq júk tasymaldaýdy damytýdyń jol kartasy qabyldanǵan bolatyn. Osy qujat aiasynda júk tasymaldaýshylaryn qoldaý sharalary qalai júzege asyp jatqany aityldy. Sonyń nátijesinde, ýákiletti organǵa Jol kartasyna engizý úshin qosymsha biznes-usynystar ázirleý júkteldi. Sonymen birge, halyqaralyq avtomobil kóligi operatorlaryn 2025 jylǵa deiin júk kóligi tartqyshy úshin tólenetin bastapqy tirkeý jarnasynan bosatý máselesi kóterildi.
2020 jyldyń 2 shildesinen bastap 2021 jyldyń 1 qańtaryna deiin halyqaralyq júk tasymaly úshin satyp alynǵan júk kóligi tartqyshy bastapqy tirkeý jarnasynanan bosatyldy. Bul sharany 2025 jylǵa deiin jańartý josparlanýda. Zań jobasyna bul túzetý kelesi jyldyń basynda engiziledi.
Eske salaiyq, paidalaný merzimi 3 jyldan 5 jylǵa deiingi júk kóligi tartqyshtary úshin bastapqy tirkeý jarnasy 350 AEK quraidy. 2020 jyldyń qazan aiynan bastap biylǵy jyldyń jeltoqsan aiyna deiingi kezeńde Á. Smaiylovtyń tóraǵalyǵymen biznestiń problemalyq máselelerin qaraý boiynsha 33 otyrys ótkizildi.
«Atameken» UKP jáne biznes ókilderimen birge Úkimet 160-tan astam problemalyq máseleni qarady.
