Áleýmettik distantsiiany týdyratyn pandemiia emes, áleýmettik jeli bolyp otyr.
Bul oiymen belgili saiasattanýshy Aidos Sarym Qazaqstan azamattyq aliany ótkizgen jas saiasattanýshylardyń Policy Camp respýblikalyq onlain mektebindegi onlain jiynda aitty, dep habarlaidy QazAqparat.
Onlain jiynda saiasattanýshy Aidos Sarym áleýmettik jeliniń qoǵam damýyna keltirip jatqan ziiany týraly baiandady.
«Bizdiń qoǵam internettiń ishinde áleýmettik jelide qalyptasqan psihologiia men zańdylyqtardy qiialdaǵy emes kádimgi kúndelikti ómirge alyp kele jatyr. Bul saiasatqa da, mádenietke de, otbasyǵa da teris áserin tigizip jatyr. Internet týraly qazir kóp jerlerde maqala, kitap jazylyp jatyr. Internettiń qoǵam psihologiiasyna teris áseri aitylyp jatyr. Kezinde demokratiialandyrý, adamdardy jaqyndastyrý degen úlken maqsatpen qurylǵan áleýmettik jeli qazir kerisinshe qoǵamdy demokratiiadan totalitarlyq baǵytqa alyp bara jatyr degen teoriia bar. Ekinshiden, bul psihologiialyq turǵydan adamdardy bir-birinen alystatyp jatyr. Bizde pandemiia kezinde áleýmettik distantsiia degen uǵym paida boldy. Áleýmettik distantsiiany týdyratyn pandemiia emes, áleýmettik jeli dep oilamyn. Qazir adamdardyń tulǵalardyń ózin ózi tanytýǵa qulshynysyn týdyrǵan zaman. Ózin ózi tanytýdyń, abai aitqandai «tolyq adam» kategoriiasyna jetkizý úshin adamnyń atyn shyǵarý emes, potentsialyn paidalaný kerek dep oilaimyn. Biz kóbinese eki jerde shatasamyz. Qatty sóileý, úlken-kishige bárine «sen» dep sóileý internetten kelip jatqan dúnie. Bul bizdiń qoǵamdaǵy syndarly dialogqa kesirin tigizedi», - dedi Aidos Sarym.
Onyń aitýynsha, internet kez-kelgen salada qalyptasqan ierarhiiany joiady.
«Bul degenińiz men bastyqpyn, siz - qolastymdaǵy jumysshysyz degen sóz emes. Kez-kelgen kásip, sonyń ishinde politologiia kásibi de ierarhiiaǵa negizdeledi. Ár mádeniet, ǵylym bilim osy ierarhiiadan turady. Mádenietten, qoǵamnan ierarhiia ketkende avtoritet ketedi. Ásirese áleýmettik jeliden avtor ketedi. Mysaly ǵylymdy 40 jyl qazbalaǵan ǵalym men mektepten keshe ǵana shyqqan oqýshynyń deńgeii bir bolyp qaldy. Meniń oiymsha, bul durys emes. Júregime operatsiia jasaý kerek pe dep men kórshilerimnen emes, Facebook qaýymdastyǵynan emes, dárigerden suraǵanym jón», - dedi saiasattanýshy.
