Alǵash ret Qytaidyń Ýhan qalasynda tirkelgen COVID-19 infektsiiasy búginde álemde jarty millionnan astam adamnyń ómirin jalmady. Osyǵan orai álemniń birqatar elinde koronavirýs indetinen qaza tapqandardy eske alýǵa arnalǵan qaraly jiyn ótti, dep habarlaidy QazAqparat.
Qytaida adamdardy qutqaryp qalý úshin óz ómirin qurban etken dárigerler men koronavirýstan qaza tapqan azamattardy jalpyulttyq aza tutý kúni 4 sáýirde ótti.
Qytai turǵyndary jańa koronavirýstan qaza tapqandardy úsh minýt únsizdikpen aza tutty. Aza tutý belgisi retinde dabyl qaǵylyp, avtomobilder, poiyzdar men kemeler gýdoktaryn qosty. Búkil elde tý tómen túsirilip, barlyq oiyn-saýyq jáne qoǵamdyq sharalarǵa tyiym salyndy. QHR-dyń vedomstvolyq, ulttyq BAQ jáne qytai izdeý saittary virýstan qaza tapqandardy aza tutýǵa bailanysty qara-aq túspen bezendendirildi.
Qurlyqtyq Qytaida koronavirýs juqtyrǵandardyń sany 85,5 myń adamnan asty.
Eýropada koronavirýs indetiniń taralýy Italiia men Ispaniiada bastaldy.
31 naýryz kúni Italiiada aza tutý belgisi retinde memlekettik ǵimarattarda, mektepter men mýnitsipalitetterde tý tómen túsirildi. El qaza tapqandardy bir minýt únsizdikpen eske aldy. Vatikan da Italiia jurtshylymen birge ekendigin bildirip, sol kúni memlekettik týdy tómen túsirgen edi.
Koronavirýstyń taralýy eldiń soltústiginde, Lombardiia óńirinde 21 aqpan kúni tirkeldi. Sodan keiin virýs búkil Italiiaǵa tarap ketti. Indet eń alǵash tirkelgen sátten beri bul elde 243 adamda koronavirýs tabylyp, 34,9 myń adam qaza tapty. Mamyr men maýsym ailarynda ótken Italiia men Germaniiadaǵy fýtbol chempionatynyń birneshe oiyny indetten qaza tapqandardy bir minýt únsizdikpen eske alýdan bastaldy.
27 mamyrda Ispaniia da Covid-19 qurbandaryn bir minýt únsizdikpen eske aldy. Búkil el turǵyndary 1 minýtqa jumystaryn toqtatty. Birminýttyq únsizdikten keiin elde 10 kúndik aza tutý jariia etildi. 10 kún boiy úkimettik ǵimarattar men áskeri kemelerdegi tý tómen túsirildi.
Naýryz aiynan osy ýaqytqa deiin Ispaniiada Covid-19-dan 28 myńnan astam adam kóz jumdy. Al indet juqtyrǵandar sany 300 myń adamnan asyp túsedi. Ótken aptadan bastap bul elde koronavirýs indetin juqtyrý jaǵdailarynyń qaita beleń alyp bara jatqandyǵy baiqalady. 16 shilde kúni Ispaniiada koronavirýs pandemiiasy saldarynan qaza tapqandardy eske alýǵa arnalǵan memlekettik shara ótedi.
28 sáýirde Ulybritaniia Covid-19-dan qaza tapqan meditsina jáne áleýmettik qyzmetkerlerdi bir minýttyq únsizdikpen eske aldy. Qazirgi ýaqytta elde virýs juqtyrýdyń 290 myńǵa jýyq jaǵdaiy naqtylanǵan. Qaza tapqandardyń sany 44,8 myń adamnan asyp ketti. Jalpy, Ulybritaniia Eýropadaǵy indetten eń kóp adamynan aiyrylǵan el sanalady.
Shvetsiia Parlamenti 17 maýymda koronavirýs indetinen qaza tapqan 5,5 myń azamatyn eske alýǵa arnalǵan 15 minýttyq shara ótkizdi. Shara birminýttyq únsizdikpen aiaqtaldy.
Buǵan deiin 31 naýryzda Frantsiianyń Ulttyq assambleiasy koronavirýs indetinen qaza tapqandardy eske alǵan edi.
Qazaqstanda 13 shilde - Jalpyulttyq aza tutý kúninde 1 minýttyq únsizdik ótti. Aqorda rezidentsiiasynyń aldynda Memleket basshysy Qasym-Jomart Toqaev koronavirýs indetinen qaza tapqan azamattardy qurmetpen bir minýt eske aldy. Eske alý rásimine QR Memlekettik hatshysy Qyrymbek Kósherbaev, QR Prezidenti Ákimshiliginiń basshysy Erlan Qoshanov, Qaýipsizdik Keńesiniń hatshysy Áset Isekeshev, Prezident Keńsesiniń bastyǵy Nurlan Onjanov, Densaýlyq saqtaý ministri Aleksei Tsoi qatysty.
Indet qurbandaryn únsiz eske alý rásimi respýblikanyń barlyq aimaǵynda ótti. Qurbandarǵa taǵzym sharasyn respýblikalyq arnalar tikelei efir arqyly kórsetti. Búkil elimizde memlekettik tý tómen túsirilip, telearnalar men radiolar efirden oiyn-saýyq baǵdarlamalaryn alyp tastady.
13 shildedegi derekterge sáikes, Qazaqstanda koronavirýstan 375 adam qaza tapty.
