Bokstan álem chempiony Bekzat Nurdáýletov sportqa qalai kelgenin, Kýbanyń dańqty boksshysyn qalai jeńgenin, endigi maqsaty qandai ekenin Sputnik Qazaqstan tilshisine bergen suqbatynda aitty.
Eki dúrkin Qazaqstan chempiony
Bekzat Nurdáýletov 1998 jyldyń 10 sáýirinde Mańǵystaý oblysy Jańaózen qalasynda dúniege kelgen. Bokspen 2009 jyldan beri shuǵyldana bastapty.
"11 jastan bastap, bokspen shuǵyldana bastadym. Iaǵni Jańaózendegi Rahmet Ótesinov atyndaǵy sport kesheninde jattyqtym. Alǵashqy bapkerim – Batyrbek Jailybaev", - deidi sportshy balalyq shaǵyn esine alyp.
Ol 10-synypta oqyp júrgen kezde sportta joǵary nátijege qol jetkize bastaidy. Osy ýaqytta Nurdáýletov jasóspirimder arasynda eki dúrkin Qazaqstan chempiony atanady. Al 2016 jyly jasóspirimder arasyndaǵy álem chempionatynda qola júldeni qanaǵat tutady.
Qazirgi ýaqytta 22 jastaǵy Bekzatty QR eńbek sińgen bapkeri Marat Jákiev jattyqtyrady. Ol 2005 jylda álem chempiony ataǵan Erdos Jańabergenov pen Olimpiada oiyndarynyń eki dúrkin kúmis júldegeri Ádilbek Niiazymbetovti daiyndaǵan.
"Kývalda"
Áńgime barysynda Bekzat Nurdáýletov óziniń laqap atyna bailanysty pikirin bildirdi. Osyǵan deiin qazaqstandyq BAQ-ta 22 jastaǵy sportshyny dostary joiqyn ári dál soqqylary úshin "Kývalda" dep ataityny týraly aqparat tarady.
"Jaqyn aralasatyn dostarym olai aitpaidy. Meniń oiymsha, bul gazet-jýrnaldardyń ózderiniń shyǵarǵany shyǵar", - dep ol qysqa jaýap qaiyrdy.
Levitpen judyryqtasqan
Mańǵystaýlyq jas boksshy ótken jyly Qazaqstan chempionatynda 91 kelige deiingi salmaqta baǵyn synaǵan. Bul jarysta ol finalǵa deiin jetip, tórt dúrkin Qazaqstan, eki dúrkin Aziia chempiony, Rio Olimpiadasynyń kúmis júldegeri Vasilii Levitpen judyryqtasqan edi. Bul jekpe-jekte tájiribeli Levit jeńimpaz atandy. Al biyl Ekaterinbýrgte ótken álem chempionatynda Nurdáýletov 81 kelige deiingi salmaqta óner kórsetti.
"Salmaq tastaý aýyr bolǵan joq. Sebebi, meniń salmaǵym 91 kelige jetpeitin. Sondyqtan bapkerim ekeýmiz 81 kelige deiingi salmaqta judyryqtasamyz degen sheshim qabyldadyq", - deidi qazaqstandyq sportshy.
Álem chempionatyndaǵy jeńis
22 jastaǵy qazaqstandyq boksshy Reseide ótken álem chempionatynda sátti óner kórsetýin durys qoiylǵan taktika men uzaq jyldar boiy jinaǵan tájiribeniń ushtasýy dep biledi.
Sonymen qatar Nurdáýletov jartylai finalda 4 dúrkin álem chempiony jáne Rio Olimpiadasynyń jeńimpazy, kýbalyq Hýlio Sesar La Krýsqa qarsy sharshy alańǵa shyqty. Ol jekpe-jek aldynda esh qobaljymaǵanyn, tek jattyqtyrýshynyń bergen keńesine qulaq asqanyn atap ótti.
"La Krýspen rinkge shyǵardyń aldynda eshqandai qorqynysh bolǵan joq. Ol da adam ǵoi. Sondyqtan bul jekpe-jekte ýaiymdaǵan joqpyn. Tek bapkerimniń aitqanyn oryndadym. Sonyń arqasynda jeńiske jettim", - dedi ol.
Kútpegen málimdeme
Áńgime barysynda Bekzat kýbalyq boksshy Hýlio Sesar La Krýstyń "Ekaterinbýrgte ótken álem chempionatynda tóreshiler ádiletsizdik jasady" degen málimdesine qatysty óz oiyn aitty.
"Árbir adam óz pikirin aitýǵa quqyly. Bul jekpe-jekte 5 tóreshi otyrdy. Olar aqyldasa kele, óz sheshimderin shyǵardy. Sonymen qatar bul jekpe-jekti kórermender kórdi dep oilaimyn. Sondyqtan kim jeńgenin halyq sheshsin", - dedi sportshy.
Aldaǵy jospar
Sonymen qatar álem chempiony aldaǵy josparymen de bólisti.
"Endi maqsatym – Olimpiadaǵa joldama alyp, kók týymyzdy jelbiretý. Ol úshin daiyndalyp jatyrmyn. Aldaǵy maqsat – Olimp shyǵyn baǵyndyrý", - dep túiindedi sózin Bekzat Nurdáýletov.
