Álemde birinshi ret Kievtegi mádeniet jáne óner ulttyq ýniversitetinde "TikTok fakýlteti" ashyldy. Ýkrainalyq joǵary oqý orny túlekterge diplom berýge ýáde berip otyr dep habarlaidy Gromadskoe televidenie arnasyna silteme jasap KAZ.NUR.KZ.
Telearnanyń málimetinshe, joba avtory ýniversitet prezidenti, ózi de tanymal tiktokshy Mihail Poplavskii.
Poplavskii jastardyń zaman aǵymynan qalmaýyn jáne áleýmettik jeli arqyly tanymaldylyqqa ie bolýy tiis dep sanaidy. Ol ózi ashqan "TikTok" fakýltetin innovatsiialyq jastar jobasy retinde usynǵan.
"Meniń maqsatym - "TikTok-qa" ýkrainalyq sipat berý, artymnan kreativti, jigerli ári bolashaqqa senetin jastardyń ergenin qalaimyn. Olar elimizdiń bolashaǵyn jasaýshylar. Ýkrainalyqtardy álem jaqsy bilýi tiis, Ýkraina álemdi áli talai tańǵaldyrady", - deidi JOO prezidenti.
Oqý mádeniet ýniversitetiniń barlyq stýdentteri úshin tegin bolmaq.
Ýniversitet mamandary bolashaq tiktokshylar áleýmettik jeliniń jańalyqtaryn jaqsy bilip, erekshe kontent usyna otyryp, zamanǵa sai júrý kerektigin aitady.
"Eger ómirde kóshbasshy bolǵylaryńyz kelse, "TikTok" sizge aýadai qajet. Ózińdi damytýyń kerek, al biz saǵan kómektesemiz", - delingen atalmysh ýniversitet taratqan baspasóz habarlamasynda.
Fakýltettiń ashylý saltanatynan soń Poplavskii stýdenttermen birge alǵashqy birlesken tiktoktaryn túsirgen.
Ýkrainalyq BAQ ázirge fakýltettiń ministrlikten akkreditatsiia ótken-ótpegeni jóninde aqparat ala almaǵan.
