QR Densaýlyq saqtaý ministri Aleksei Tsoi omikron shtamynyń Qazaqstanǵa kelý yqtimaldyǵy týraly pikir bildirdi, dep habarlaidy QazAqparat.
«Qazir eń basty másele monitoring bolyp otyr. Sebebi ázirge jańa shtamm tolyq zerttelip bitken joq. Álemde túrli shtamdar paida bolyp jatqanyn bilip otyrsyzdar. Biriniń ornyn biri almastyryp jatyr – liambda, odan keiin Eta-shtamm... Ár shtamǵa erekshe nazar aýdarýǵa májbúrmiz. Ár paida bolǵan shtamnyń qalai taraitynyn alǵash paida bolǵan eldegi jaǵdaiǵa qarap túsinýdiń mańyzy zor. Jaqynda ǵana Jenevada bolyp, Dúniejúzilik densaýlyq saqtaý uiymynyń bas direktorymen kezdestik. Sol kezde bul shtamdy zertteitin jumys toby qurylǵany aityldy. Eń bastysy, bul shtamnyń sońy pandemiiaǵa ulaspaǵany kerek. Iaǵni, el ishinde taralýyn baqylaýda ustaý mańyzdy», - dedi ministr BAQ ókilderine bergen suhbatynda.
Onyń aitýynsha, qazir búkil álem qaýymdastyǵynyń mindeti – shtamnyń qanshalyqty juqpaly ekenin, onyń qalai áreket etetinin, onyń klinikalyq kórinisterin jáne adamdar úshin qanshalyqty qaýipti ekenin baqylaý.
«Ázirge senimdi derekter joq. Tek jekelegen derekter bar. Epidemiologiialyq monitoring júiesi jumys istep jatyr. Biz ai saiyn shetelden kelgen, ásirese, taldaý qorytyndysy syrqat bar ekenin kórsetken azamattardan synamalar alyp otyrmyz. Tiisinshe, halyqaralyq málimetter bazasy arqyly bul synamalardyń virýs shtamynyń qaisysyna jatatyny tekseriledi. Sondyqtan, jaqyn arada biz naqty qorytyndy alamyz, sonyń negizinde bári túsinikti bolady. Virýstyń bul shtamy Qazaqstanǵa kelgen kúnniń ózinde onyń tabiǵatyn, taralý tásilin túsiný mańyzdy», - dedi Aleksei Tsoi.
