QR Densaýlyq saqtaý ministri Aleksei Tsoi DDSU Eýropalyq óńirlik komitetiniń 70-sessiiasynyń tóraǵasy bolyp sailandy, dep habarlaidy "Ult aqparat".
Búgin DDSU Eýropalyq óńirlik biýrosynyń 70-sessiiasy bastaldy, halyqaralyq jiynnyń tóraǵasy bolyp alǵash ret Qazaqstan Respýblikasynyń Densaýlyq saqtaý ministri Aleksei Tsoi sailandy.
Vedomstvo basshysy óz sózinde álemdik densaýlyq saqtaý úshin óte mańyzdy sharaǵa tóraǵalyq etý - ol úshin úlken qurmet pen jaýapkershilik ekenin jetkizdi.
«Halyqaralyq qoǵamdastyq pen Dúniejúzilik densaýlyq saqtaý uiymynyń qoldaýymen, biz ózge eldermen yntymaqtasa otyryp, COVID-19 qarsy kúresti jalǵastyramyz. Qazir Qazaqstandaǵy jaǵdai turaqtaldy, al koronavirýs infektsiiasy qaita órshitin bolsa, arnaiy jospar ázirledik. Patsientterdi tósek-oryn, qajetti dárilik preparat jáne basqa da resýrstarmen qamtamasyz etemiz. Otandyq dárigerler halyqqa kómek kórsetýge daiyn», - dedi A.Tsoi.
Eýropa aimaǵyndaǵy DDSU-ǵa múshe 53 memlekettiń densaýlyq saqtaý ministrleri men ózge de joǵary laýazymdy azamattar, sondai-aq seriktes uiymdar men azamattyq qoǵam ókilderi eki kún boiy densaýlyq saqtaý salasyndaǵy túrli máseleni talqylaidy. Qysqartylǵan sessiianyń kún tártibindegi negizgi taqyryptardyń biri: aimaqtaǵy jáne álemdegi COVID-19 pandemiiasyna qarsy is-qimyl men tájiribe, 2020-2025 jyldarǵa arnalǵan densaýlyq saqtaýdy jaqsartýǵa baǵyttalǵan jańa Eýropalyq baǵdarlama.
Sessiianyń alǵashqy kúngi baǵdarlamasynda Daniianyń Uly mártebeli kronhanshaiymy sóz sóileidi dep josparlanýda. Budan keiin Eýropalyq óńirlik komiteti jiyrma jetinshi shaqyrylymnyń Turaqty komitetiniń esebi tyńdalyp, tiisti qarardyń jobasy qabyldanady.
Sondai-aq, DDSU bas direktory doktor Tedros Adhanom Gebreiesýs aimaqtyq komitet sessiiasynyń delegattary aldynda sóz sóileidi. Ol álemdegi jaǵdaiǵa, sonyń ishinde COVID-19 pandemiiasymen kúresý tájiribesine sholý jasaidy.
Jiynnyń kún tártibin sáikes DDSU Eýropalyq óńirlik biýrosynyń basshysy Hans Kliýge Eýropalyq jańa jumys baǵdarlamasyn usyna otyryp, Eýropadaǵy densaýlyq saqtaýdyń damýy týraly baiandama jasaidy.
Eýropalyq jumys baǵdarlamasynda óńirdegi múshe memleketter úsh basym mindet - densaýlyq saqtaý qyzmetterimen jappai qamtýǵa kóshý, densaýlyq saqtaý salasyndaǵy tótenshe jaǵdailardan qorǵaý jáne salaýatty ómirdi qamtamasyz etý jáne kez kelgen jastaǵy adamdarǵa qajet kezde járdemdesý mindetterin oryndaýǵa úles qosý degen tujyrym baiandalǵan.
Sessiianyń ekinshi kúni DDSU-nyń Eýropalyq aimaqtaǵy qaita qurylýyn talqylaý josparlanýda. Óńirlik Komitetke DDSU-nyń jahandyq jáne óńirlik deńgeidegi qaita qurylýy sheńberinde DDSU Eýropalyq óńirlik biýrosynyń qazirgi jáne josparlanǵan qyzmetine sholý usynylatyn bolady. Komitetke tiisti jumys qujatyn qaraý usynylady.
Sessiia otyrystary aǵylshyn jáne orys tilderinde kórsetiledi. Sonymen qatar, halyqaralyq jiyn DDSU Eýropalyq aimaqtyq biýrosynyń arnalary arqyly jariialanady (#RC70Europe).
DDSU Eýropalyq óńirlik biýrosynyń sessiiasyn myna siltemeden kórýge bolady.
