Qazaqstan aldaǵy ýaqytta syrttan qaryz alýdy doǵarady. Bul týraly QR Qarjy ministri Erulan Jamaýbaev aitty, dep habarlaidy "Ult aqparat".
«Qazaqstannyń damý tarihynda bir emes birneshe daǵdarys boldy. Atap aitar bolsaq, 1999 jylǵy daǵdarys, odan keiin 2007 jyly Amerikadaǵy ipotekalyq qaryzdan bastap, dúniejúzine tarap Qazaqstanǵa jetken daǵdarys, 2014-2015 jyldardaǵy munaidyń kúrt quldyraýynan týyndaǵan daǵdarys bar. Al 2020 jyly jetken jai daǵdarys emes. Ol koronavirýspen qabattasqan óte kúrdeli daǵdarys boldy», - dedi ministr Ortalyq kommýnikatsiialar qyzmetindegi baspasóz máslihaty barysynda BAQ ókilderiniń saýalyna orai.
Onyń atap ótýinshe, ótken jylǵy daǵdarystyń halyqqa da, kásipkerlerge de aýyr tiiýine bailanysty elimiz syrttan qaryz aldy.
«Biraq, alynǵan qaryzdyń kólemi qaýipsizdik deńgeiinde saqtalyp tur dep aitýǵa bolady. Jalpy, shetelden alynǵan qaryzdardyń basym bóligi - kásipkerlerdiń, iaǵni sheteldik kompaniialardyń osy jerdegi enshilis kompaniialary arasynda qalyptasqan qaryz. Aldaǵy ýaqytta múmkindiginshe syrttan qaryz alýdy doǵaryp, ekonomikanyń munaiǵa bailanysty salalaryn ártaraptandyryp, damytyp, solardan túsetin salyq esebinen jaǵdaidy túzýge tolyq múmkindigimiz bar deýge bolady», - dedi Erlan Jamaýbaev.
