Premer-ministr Oljas Bektenovtiń tóraǵalyǵymen Alataý qalasy keńesiniń alǵashqy otyrysy ótip, Memleket basshysynyń jańa qalany damytý jónindegi tapsyrmalaryn iske asyrý barysy talqylandy, dep habarlaidy ult.kz.
Úkimet basshysy biyl 1 shildeden bastap kúshine engen «Alataý qalasynyń arnaýly quqyqtyq rejimi týraly» Konstitýtsiialyq zań jańa ekonomikalyq reformalardyń mańyzdy bóligi ekenin atap ótti. Onyń aitýynsha, Alatau City jobasy investitsiia tartý, zamanaýi basqarý júiesin engizý jáne ekonomikalyq ósimniń jańa draiverin qalyptastyrýǵa baǵyttalǵan.
Otyrysta Alatau City Authority bas atqarýshy direktory Alisher Abdyqadyrov jańa qalany damytý josparlaryn tanystyrdy. Qazir normativtik-quqyqtyq bazany qalyptastyrý, strategiialyq qujattardy ázirleý, investitsiialyq jobalardy súiemeldeý jáne Yntymaq, Qoianqus, Jetigen, Jańadáýir men Jańatalap shaǵyn aýdandarynyń injenerlik-kólik infraqurylymyn jańǵyrtý jumystary júrgizilip jatyr.
Jospar boiynsha biylǵy jyldyń sońyna deiin halyqaralyq ARUP jáne BCG kompaniialarynyń qatysýymen Alataýdy 2055 jylǵa deiin damytýdyń uzaqmerzimdi jospary, 2040 jylǵa deiingi damý strategiiasy men master-jospary ázirlenedi.
Sondai-aq keńeste K-Smart City, Alatau AI-Driven City jáne Alatau Crypto City jobalary tanystyryldy. Olar smart-tehnologiialardy engizý, jasandy intellekt pen Big Data negizinde qalany basqarý, sondai-aq Web3 ekojúiesi men tsifrlyq aktivterdi damytý baǵyttaryn qamtidy.
Búginde Alataýda jalpy quny 2 trln teńgeni quraityn, 51 myń jańa jumys ornyn ashatyn 53 investitsiialyq jobanyń pýly qalyptastyrylǵan. Olardyń qatarynda Iconic Complex, PepsiCo, Mars, Hyundai Green Food óndiristeri, Khan Tengri Biopharma biofarmatsevtikalyq zaýyty, qalalyq áýe mobildigi jobalary jáne KAIST ýniversitetiniń kampýsyn salý bastamalary bar.
Keńes qorytyndysy boiynsha Alatau City Authority uiymynyń jańa mártebesi bekitilip, Jedel komitet pen Retteýshi komissiia qurý týraly sheshim qabyldandy. Sonymen qatar Alataý qalasy ákimdigi janynan jer qatynastary jónindegi ýaqytsha komissiia qurylyp, master-jospar bekitilgenge deiin basym investitsiialyq jobalardy súiemeldeitin bolady.
Oljas Bektenov memlekettik organdar men Alatau City Authority-ge Alataý qalasyn damytýdyń negizgi baǵyttary boiynsha jumysty jedeldetýdi tapsyrdy.
