Qazaqstanda azamattarǵa bank, memlekettik organ nemese qyzmet kórsetýshi kompaniialardan keletin resmi qońyraýlardy alaiaqtardyń habarlasýynan ońai ajyratýǵa múmkindik beretin jańa júie engiziledi, dep habarlaidy ult.kz.
Bul týraly Ortalyq kommýnikatsiialar qyzmetinde ótken brifingte Jasandy intellekt jáne tsifrlyq damý vitse-ministri Dosjan Musaliev málimdedi.
Onyń aitýynsha, telekommýnikatsiia salasyndaǵy zańnamalyq ózgerister aiasynda uialy bailanys jelilerinde qońyraýlardy arnaiy tańbalaý tetigi iske qosylady. Sonyń nátijesinde telefon ekranynda qońyraý shalǵan uiymnyń ataýy kórsetiledi. Máselen, ekranda «Bank» nemese «Toyota Center» degen belgi paida bolady.
Vitse-ministrdiń aitýynsha, bul jańashyldyq azamattarǵa resmi qońyraýlardy alaiaqtardyń jalǵan habarlasýynan ońai ajyratýǵa kómektesip, telefon arqyly jasalatyn alaiaqtyqtyń aldyn alýǵa yqpal etedi.
Sonymen qatar jańa zań aiasynda internetke qol jetkizý, IP-telefoniia jáne trankingtik bailanys qyzmetterin litsenziialaý tártibi engiziledi. Budan bólek, abonentter bailanys operatorlarynyń jarnamalyq jáne aqparattyq habarlamalarynan, avtomatty qońyraýlarynan bas tarta alady. Sondai-aq aqyly bailanys qyzmetterin qosý rásimi de jańartylady.
Telekommýnikatsiia salasyna qatysty zańnamalyq ózgerister biylǵy tamyz aiynyń sońynda kúshine enedi.
