BJZQ azamattardy zeinetaqy jarnalary men eńbek ótiline qatysty jalǵan qońyraýlar kóbeigeni týraly eskertti, dep habarlaidy ult.kz. NoFake.kz basylymyna silteme jasap.
Qor málimetinshe, alaiaqtar ózderin BJZQ qyzmetkerleri retinde tanystyryp, birneshe jyl eńbek ótili zeinetaqy esepteý kezinde eskerilmei qalǵanyn aityp, tólem kólemin qaita esepteýdi usynady.
«Alaiaqtar senimge kirý úshin Qordyń naqty jumys isteitin bólimsheleriniń mekenjaiyn aityp, azamattardy sol jerge kelýge shaqyrady. Sondai-aq «qyzmetti jyldam ári yńǵaily alý úshin» aldyn ala elektrondyq kezekke qoiamyz degen syltaýmen SMS arqyly kelgen rastaý kodyn suraidy», - delingen habarlamada.
BJZQ málimetinshe, mundai kodtardy bógde adamǵa aitý qaýipti. Óitkeni SMS-kod arqyly alaiaqtar azamattardyń jeke kabinetterine, bank servisterine nemese basqa da tsifrlyq qyzmetterge qol jetkizýi múmkin.
«BJZQ qyzmetkerleri telefon arqyly, elektrondyq poshta nemese messendjerlerde SMS-kodtardy, qupiiasózderdi, bank kartalarynyń derektemelerin jáne ózge de qupiia aqparatty eshqashan suramaidy», – dep eskertti Qor ókilderi.
Sonymen qatar Qor barlyq qyzmet tegin kórsetiletinin jáne zeinetaqy tólemderin rásimdeý Qazaqstan zańnamasyna sáikes qatań tártippen júzege asyrylatynyn atap ótti. Qońyraý shalýshy adamnyń aty-jónińizdi, JSN-ińizdi nemese mekenjaiyńyzdy bilýi onyń rasymen resmi qyzmetker ekenin bildirmeidi. Mundai aqparat ashyq derekkózderden alynýy múmkin.
